ٹی 20 ورلڈ کپ 2024 کا فائنل آج بھارت اور جنوبی افریقہ کے مابین کھیلا جائے گا، محکمہ موسمیات نے بارش کی پیش گوئی کی ہے۔

جزائر غرب الہند کے شہر بارباڈوس میں ہونے والے میگا ایونٹ کے اس فائنل میچ سے قبل موسم کا حال بتانے والی مختلف آن لائن سروسز نے آج اور کل دونوں دن بارش کی پیشگوئی کی ہے۔

واضح رہے کہ فائنل کے لیے اتوار کا دن بطور ریزرو ڈے رکھا گیا ہے، لیکن اتوار کے دن بھی ممکنہ بارش کے امکانات رنگ میں بھنگ ڈالنے کے لیے تیار ہے۔

آئی سی سی کی جانب سے ایونٹ منتظمین نے فائنل میچ کے لیے 190 منٹ اضافی رکھے ہیں تاکہ بارش کی صورت میں مقررہ وقت کو پورا کیا جا سکے۔

ایونٹ منتظمین کے مطابق میچ مقامی وقت کے مطابق صبح 10:30 بجے شروع ہو گا، اگر بارش نے فائنل میں خلل ڈالا تو ایسی صورت میں فائنل اضافی وقت کی مدد سے شام 4:50 تک مکمل کرانا ہو گا۔

اگر بارش کے باعث فائنل میچ ملتوی کیا گیا تو ایسی صورت میں بھارت اور جنوبی افریقہ دونوں ٹیموں کو مشترکہ ٹی 20 ورلڈ کپ 2024 کا چیمپئین قرار دیا جائے گا۔