رہنما پیپلز پارٹی سلیم مانڈوی والا کا کہنا ہے کہ آئی پی پیز کو کسی آڈٹ کے بغیر 341 ارب روپے دیئے گئے۔

بول نیوز کے پروگرام ’بس بہت ہو گیا‘ میں گفتگو کرتے ہوئے پیپلز پارٹی کے رہنما سلیم مانڈوی والا کا کہنا تھا کہ بجلی کا مسئلہ آج کا نہیں دہائی پرانا ہے، 2016 میں فنانس کمیٹی نے ایک ایشو اٹھایا تھا۔

انہوں نے کہا کہ 341 ارب روپے آئی پی پیز کو ادا کئے گئے اور یہ ادائیگی بغیر کسی قسم کے آڈٹ کے کی گی تھی۔

رہنما پیپلز پارٹی کا کہنا تھا کہ لوڈشیڈنگ ختم کرنے کے لیے ادائیگی راتوں رات کی گئی لیکن ادائیگی کے باوجود لوڈشیڈنگ پھر بھی ختم نہیں ہوئی۔

ان کا کہنا تھا کہ آئی پی پیز کی تمام چیزیں معاہدے کا حصہ ہیں، جہاں 100 فیصد ادائیگی ہے وہاں لوڈشیڈنگ نہیں ہوتی، بجلی چوری روک لی جاتی توآج کوئی آئی پی پیز کی بات نہیں کرتا۔

آئی پی پیز کا کوئی احتساب نہیں کر رہا ہے، آئی پی پیز کا ٹیکنیکل آڈٹ کسی نےنہیں کیا، سب ایک دوسرے کو تحفظ فراہم کر رہے ہیں جبکہ صارف مر رہا ہے۔

پیپلز پارٹی رہنما کا کہنا تھا کہ وہ بجلی نہیں بنا رہے لیکن آپ بجلی بنانے کا کہہ بھی نہیں رہے، بجلی نہیں لیں گے تو ادائیگی کیسے کریں گے؟

رہنما پیپلز پارٹی سلیم مانڈوی والا نے مزید کہا کہ جو بجلی چوری ہو رہی ہے اس کی تو ادائیگی کرنا پڑے گی۔