اسپیکر قومی اسمبلی سردار ایاز صادق کے چیمبر میں اپوزیشن اور حکومتی وفد کی ملاقات ختم ہوگئی۔

ذرائع کا کہنا ہے کہ ملاقات میں بلوچستان کی موجودہ صورتحال اور قومی سلامتی سے متعلق معاملات پر تبادلہ خیال کیا گیا۔ اپوزیشن کی بلوچستان کی موجودہ صورتحال پران کیمرہ مشترکہ اجلاس بلانے کی تجویز دی گئی۔

ذرائع کے مطابق اسپیکر قومی اسمبلی کے چیمبر میں حکومتی وفد اور اپوزیشن کی ہونے والی ملاقات میں اتفاق رائے کیا گیا کہ بلوچستان میں امن و امان کی خاطر حکومت اور اپوزیشن کو ایک پیج پرہونا چاہیے۔

ذرائع کا کہنا ہے کہ ملاقات میں قومی سلامتی کی پارلیمانی کمیٹی کا اجلاس بلانے پر بھی غورکیا گیا اورحکومت اور اپوزیشن نے سرداراختر مینگل کو استعفی واپس لینے کے لیے منانے پر بھی اتفاق کیا۔

اپوزیشن کی طرف سے بیرسٹر گوہرعلی خان، عامر ڈوگر جبکہ حکومت کی طرف سے رانا ثنا اللہ اور خالد مگسی ملاقات میں موجود تھے۔

واضح رہے کہ دو روز قبل بلوچستان نیشنل پارٹی مینگل کے سربراہ اختر مینگل نے قومی اسمبلی کی رکنیت سے مستعفی ہونے کا اعلان کیا تھا جس کے بعد اپوزیشن اور حکومتی وفد نے سرداراخترمینگل سے استعفٰی واپسی سے متعلق علیحدہ علیحدہ ملاقاتیں بھی کیں۔