ہسپانوی نیشنل پولیس نے کیوبا سے اسپین انسانی سمگلنگ میں ملوث 36 افراد کے گینگ کو گرفتار کر لیا ہے۔

پولیس نے ملک کے مختلف شہروں میں بیک وقت آپریشنز کر کے اس نیٹ ورک کے ارکان کو پکڑا جو اسپین، سربیا، شمالی مقدونیہ اور یونان میں فعال تھا۔

اس گینگ نے کیوبا سے اسپین 67 افراد کو غیر قانونی طور پر داخل کرنے کی سہولت فراہم کی تھی۔

آپریشن میں یوروپول اور یورو جسٹ کے اداروں کی مدد بھی شامل تھی۔ گینگ لوگوں کو ہوائی جہاز کے ذریعے کیوبا سے سربیا پہنچاتا تھا، جہاں سے انہیں شمالی مقدونیہ اور یونان کے راستے اسپین پہنچایا جاتا تھا۔

اس عمل میں ہسپانوی شہریوں کے چوری شدہ شناختی دستاویزات کا استعمال کیا جاتا تھا تاکہ سمگل ہونے والے افراد اسپین میں داخل ہو سکیں۔

پولیس کے مطابق ہر سمگل ہونے والے شخص نے گینگ کو تقریباً دس ہزار یورو کی رقم دی تھی۔ گرفتار ہونے والے 36 افراد میں گینگ کے چار رہنما بھی شامل ہیں، جنہیں الیکانتے اور مالاگا سے گرفتار کیا گیا ہے۔

 پولیس نے اس کارروائی کو انسانی سمگلنگ کے خلاف ایک بڑی کامیابی قرار دیا ہے۔