امریکی صدر ڈونلڈ ٹرمپ اور دنیا کے امیر ترین شخص ایلون مسک کے درمیان تعلقات میں شدید کشیدگی پیدا ہو گئی ہے۔

 وائٹ ہاؤس کے ایک اعلیٰ عہدیدار کے مطابق صدر ٹرمپ ایلون مسک سے بات چیت میں کوئی دلچسپی نہیں رکھتے اور آج دونوں کے درمیان کسی بھی رابطے کا کوئی امکان نہیں ہے۔

واضح رہے کہ اس سے قبل ایک اور وائٹ ہاؤس عہدیدار نے دعویٰ کیا تھا کہ دونوں رہنماؤں کے درمیان جمعے کو بات چیت متوقع ہے، تاہم صدر ٹرمپ نے امریکی ںیوز چینل سے گفتگو کرتے ہوئے کہا کہ میں ایلون کے بارے میں سوچ بھی نہیں رہا، اُس بےچارے کو کوئی مسئلہ ہے۔

یہ تنازع اس وقت شدت اختیار کر گیا جب ایلون مسک نے ٹرمپ کے مجوزہ ٹیکس کٹوتی اور اخراجات کے بل کو شدید تنقید کا نشانہ بناتے ہوئے اسے قابلِ نفرت بل قرار دیا، جو بقول ان کے، ملک کے 36.2 ٹریلین ڈالر کے قرض میں مزید اضافہ کرے گا۔

ٹرمپ اور مسک، جو ماضی میں قریبی اتحادی سمجھے جاتے تھے، جمعرات کو سماجی رابطوں کی ویب سائٹس پر کھلے عام ایک دوسرے کے خلاف برسرپیکار رہے۔

مزید پڑھیں: حکومت سے نکلنے کے بعد ایلون مسک کا ٹرمپ پرسنگین الزام

اسی روز ٹیسلا کے شیئرز میں 14 فیصد کی ریکارڈ کمی دیکھی گئی، جس کے باعث کمپنی کی مارکیٹ ویلیو میں 150 ارب ڈالر کی کمی واقع ہوئی، تاہم جمعے کو مارکیٹس کھلنے پر ٹیسلا کے حصص میں 4.5 فیصد بہتری آئی۔

ایلون مسک ماضی میں ٹرمپ کی صدارتی مہم کے بڑے مالی معاون رہے ہیں اور بعد ازاں انہیں وفاقی اخراجات میں کمی اور سرکاری اداروں کی تنظیم نو کے لیے وائٹ ہاؤس میں ایک اہم کردار سونپا گیا تھا، تاہم حالیہ اختلافات کے باعث انہوں نے گزشتہ ہفتے اپنی ذمہ داریوں سے استعفیٰ دے دیا تھا۔

ادھر امریکی ایوانِ نمائندگان سے مذکورہ ٹیکس بل معمولی اکثریت سے منظور ہو چکا ہے، مگر سینیٹ میں اس کی منظوری اب بھی غیر یقینی ہے۔

ریپبلکن قیادت مزید ترامیم کی خواہاں ہے، جبکہ ماہرین کے مطابق یہ بل آئندہ 10 سال میں وفاقی قرضے میں 2.4 ٹریلین ڈالر اضافہ کرے گا۔

ایوانِ نمائندگان کے اسپیکر مائیک جانسن نے امریکی نشریاتی ادارے  کو بتایا کہ وہ مسک سے رابطے میں ہیں۔ ان کا کہنا تھا کہ میں ایلون سے راکٹس بنانے پر بحث نہیں کرتا، اور مجھے امید ہے وہ بھی قانون سازی پر مجھ سے بحث نہیں کریں گے۔