امریکی صدر ڈونلڈ ٹرمپ ٹک ٹاک کی امریکی شاخ کو خریدنے کے لیے پرعزم ہیں، اور ان کو توقع ہے کہ چینی صدر ٹک ٹاک کی فروخت کی منظوری دے دیں گے۔

ڈونلڈ ٹرمپ نے امریکی میڈیا کو دیے گئے انٹرویو میں بتایا کہ ٹک ٹاک کی امریکی شاخ خریدنے کے لیے ایک “بہت امیر افراد” پر مشتمل خریدار گروپ موجود ہے، امکان ہے کہ ان خریداروں کے نام دو ہفتوں کے اندر سامنے آجائیں گے۔

ٹرمپ نے واضح کیا کہ اس معاہدے کو آگے بڑھانے کے لیے چینی صدر شی جن پنگ کی حتمی منظوری درکار ہوگی۔ انھوں نے امید ظاہر کی کہ چینی صدر شی یہ منظوری دے دیں گے۔

مزید پڑھیں: امریکہ نے ٹک ٹاک کی فروخت میں مزید 90 دن کی توسیع کردی

واضح رہے کہ 2024 کے امریکی قانون کے مطابق 19 جنوری 2025 تک ٹک ٹاک یا تو بیچنے یا بند کرنے کا حکم دیا گیا تھا۔ تاہم، ٹرمپ اس تاریخ کو تین مرتبہ بڑھا چکے ہیں۔

آخری بار انھوں نے ٹک ٹاک پر پابندی کے فیصلے کو 17 ستمبر 2025 تک موخر کر دیا ہے، تاہم تجارتی کشیدگی اور توقعاتی فیصلوں کی وجہ سے یہ معاملہ ابھی بھی تاخیر کا شکار ہے ۔

ٹرمپ نے تسلیم کیا ہے کہ ٹک ٹاک نے نوجوان ووٹرز میں ان کی مقبولیت مستحکم کرنے میں اہم کردار ادا کیا، لہٰذا اس کی امریکی موجودگی برقرار رکھنے کے لیے وہ توسیع کروا چکے ہیں۔