رواں سال لیبیا کشتی حادثے میں ملوث بدنام زمانہ ملزم کو ایف آئی اے نے گرفتار کر لیا ہے۔

ایف آئی اے کمپوزٹ سرکل کوہاٹ نے 2025 میں لیبیا کشتی حادثے میں ملوث بدنام زمانہ ملزم ریاض حسین کو گرفتار کر لیا ہے۔ ملزم کرم ایجنسی کا رہائشی ہے اور اس پر انسانی اسمگلنگ کے سنگین الزامات ہیں۔

مزید پڑھیں: لیبیا میں کشتی حادثہ؛ 11 تارکین وطن جاں بحق، 4 پاکستانیوں کی تصدیق

ملزم ریاض حسین نے ایک شہری سے یورپ بھیجنے کے لیے 36 لاکھ روپے وصول کیے، تاہم اسے لیبیا بھیج دیا۔ وہاں پہنچنے پر، ملزم اور اس کے ساتھیوں نے غیر قانونی طور پر کشتی کے ذریعے یورپ داخل کرانے کی کوشش کی، جس دوران کشتی حادثے کا شکار ہو گئی اور شہری کی موت واقع ہوئی۔

ایف آئی اے نے ملزم کے پانچ بینک اکاؤنٹس فریز کر کے 60 لاکھ روپے کی رقم ضبط کی ہے۔ ملزم کو اسپیشل کورٹ امیگریشن سنٹرل سے ضمانت قبل از گرفتاری منسوخ ہونے پر گرفتار کیا گیا۔

ایف آئی اے کی جانب سے ریاض حسین کے دیگر ساتھیوں کی گرفتاری کے لیے چھاپے مار کارروائیاں جاری ہیں۔

ترجمان ایف آئی اے نے کہا ہے کہ ملزم کے خلاف تفتیش کا آغاز کر دیا گیا ہے اور اس کے ساتھ شریک دیگر ساتھیوں کی گرفتاری کے لیے اقدامات کیے جا رہے ہیں۔