وزیرِ اعظم پاکستان، شہباز شریف سعودی عرب کے ولی عہد محمد بن سلمان کی دعوت پر دو روزہ دورے پر جدہ روانہ ہوگئے ہیں۔

وزیرِ اعظم 5 اور 6 جون کو سعودی عرب کا دورہ کر رہے ہیں، جبکہ اطلاعات ہیں کہ وزیرِ اعظم عید الاضحی بھی سعودی عرب میں گزاریں گے، جہاں وہ سعودی ولی عہد محمد بن سلمان سے ملاقات کریں گے۔

وزیرِ اعظم شہباز شریف اور سعودی ولی عہد محمد بن سلمان کے درمیان خصوصی ملاقات بھی متوقع ہے، جس میں دونوں ممالک کے درمیان تجارت، سرمایہ کاری، امت مسلمہ کی فلاح، اور علاقائی امن و سلامتی کے حوالے سے دوطرفہ تعلقات کو مزید مستحکم کرنے پر گفتگو کی جائے گی۔

وزیرِ اعظم حالیہ پاک بھارت تنازع میں سعودی قیادت کے تعمیری کردار کو سراہتے ہوئے ان کا شکریہ ادا کرنے کا بھی ارادہ ظاہر کیا ہے۔

وزیرِ اعظم کے ہمراہ ایک اعلیٰ سطحی وفد بھی سعودی عرب کا دورہ کر رہا ہے، جو دونوں ممالک کے تعلقات کو مزید فروغ دینے کے لیے مختلف شعبوں میں بات چیت کرے گا۔

یہ دورہ پاکستان اور سعودی عرب کے مابین دوستانہ تعلقات کو مزید مضبوط کرنے اور اہم مسائل پر بات چیت کرنے کا ایک اہم موقع ہے۔