پاکستان میں یومِ آزادی 2025 کو ’’معرکۂ حق‘‘ کے عنوان سے منانے کا فیصلہ کیا گیا ہے، جس کا مقصد قومی جذبے اور اتحاد کو اجاگر کرتے ہوئے روشن مستقبل کی جانب پیشرفت کو خراج تحسین پیش کرنا ہے۔

وزیراعظم شہباز شریف کی ہدایت پر یومِ آزادی کی تقریبات کیلئے جامع منصوبہ بندی کی تیاری کی گئی ہے۔

اس حوالے سے وفاقی وزیر احسن اقبال کی صدارت میں ایک اعلی سطح اجلاس منعقد کیا گیا، جس میں وزیر داخلہ محسن نقوی، وزیر اطلاعات و نشریات عطاء تارڈ، وزیر تعلیم خالد مقبول سمیت اعلی حکام نے شرکت کی۔ آئی ایس پی آر، وزارت اطلاعات و نشریات اور دیگر وزارتوں کے افسران بھی اجلاس کا حصہ تھے۔

اجلاس میں فیصلہ کیا گیا کہ یومِ آزادی کی تقریبات ملک بھر اور بیرونِ ملک یکساں طور پر منائی جائیں گی۔ تمام تعلیمی ادارے، اسکولز اور جامعات اس دن کو قومی جذبے سے منانے کے لئے ایک ہی طرز پر تقریبات منعقد کریں گے۔ اس دن دفاعی، معاشی، ثقافتی و سائنسی ترقی کا فخر سے اظہار کیا جائے گا۔

وفاقی وزیر احسن اقبال نے اجلاس کے دوران کہا کہ ’یومِ آزادی قومی احیاء اور استقامت کا دن ہے۔ پاکستان بقا کی نہیں، ترقی اور قیادت کے سفر پر گامزن ہے۔

وزیر داخلہ محسن نقوی نے مزید کہا کہ قوم متحد ہے اور ہر سازش کو ناکام بنانے کے لیے تیار ہے۔

وزیر اطلاعات عطاء تارڑ نے اعلان کیا کہ اس دن کے لئے خصوصی ملی نغمے، پروگرامز اور ڈاکیومنٹریز تیار کی جا رہی ہیں۔

وزیر تعلیم خالد مقبول نے بتایا کہ اسکولوں میں مباحثے، مصوری اور دیگر سرگرمیاں ہوں گی تاکہ طلباء کو قومی جذبے سے آراستہ کیا جا سکے۔

اجلاس کے شرکاء نے یہ بھی فیصلہ کیا کہ یومِ آزادی کی تقریبات شہروں سے لے کر دیہات تک ہر پاکستانی تک پہنچائیں جائیں گی۔ اس کے علاوہ بیرونِ ملک پاکستانی سفارتخانوں میں بھی اس دن کی مناسبت سے سرگرمیاں منعقد کی جائیں گی۔