ویسٹ انڈیز کے مڈل آرڈر بیٹر روسٹن چیز نے اتوار کو پاکستان کے خلاف تیسرے اور آخری ٹی20 انٹرنیشنل میں ریٹائرڈ آؤٹ ہو کر تاریخ رقم کر دی۔

وہ فل ممبر ٹیم سے تعلق رکھنے والے پہلے کھلاڑی بن گئے ہیں جنہوں نے ٹی20 انٹرنیشنل میچ میں خود کو ریٹائرڈ آؤٹ قرار دیا۔

یہ واقعہ لاڈرہل میں کھیلے گئے میچ کے دوران پیش آیا جب ویسٹ انڈیز 190 رنز کے ہدف کا تعاقب کر رہی تھی۔ ایک عمدہ آغاز کے بعد جس میں ایلیک اتھنازے نے 60 رنز (40 گیندوں) کی برق رفتار اننگز کھیلی لیکن ویسٹ انڈیز کی رفتار درمیانی اوورز میں سست پڑ گئی۔

جب ٹیم 13ویں اوور میں 110 رنز پر تین وکٹوں کے نقصان پر کھیل رہی تھی اور 42 گیندوں پر 80 رنز درکار تھے، شرفین ردرفورڈ نے جارحانہ انداز اپنایا، لیکن دوسری طرف موجود روسٹن چیز رفتار برقرار نہ رکھ سکے۔ انہوں نے 12 گیندوں پر صرف 15 رنز اسکور کیے اور دو چوکے لگائے۔

جب اننگز میں صرف 18 گیندیں باقی تھیں اور 41 رنز کی ضرورت تھی، ویسٹ انڈیز ٹیم مینجمنٹ نے روسٹن چیز کو ریٹائرڈ آؤٹ کر کے ان کی جگہ ایک زیادہ جارح مزاج بیٹر کو میدان میں بھیجا۔

تاہم یہ حکمت عملی کامیاب نہ ہو سکی اور ویسٹ انڈیز مقررہ اوورز میں 176 رنز ہی بنا سکی، یوں پاکستان نے 13 رنز سے فتح حاصل کر کے سیریز 2-1 سے اپنے نام کر لی۔

یہ پہلا موقع نہیں جب روسٹن چیز کو ٹی 20 میچ میں ریٹائرڈ آؤٹ کیا گیا ہو۔ 2025 کے اوائل میں انٹرنیشنل لیگ ٹی 20 (ILT20)  کے دوران وہ ابوظہبی نائٹ رائیڈرز کی نمائندگی کرتے ہوئے بھی 18ویں اوور میں 20 رنز (13 گیندیں) پر ریٹائرڈ آؤٹ کیے گئے تھے۔

اس سے قبل کسی فل ممبر ٹیم کے کھلاڑی کو ٹی20 انٹرنیشنل میں ریٹائرڈ آؤٹ کرنے کی مثال موجود نہیں تھی۔

البتہ 2024 کے ٹی20 ورلڈ کپ میں نمیبیا کے نکولاس ڈیوِن نے انگلینڈ کے خلاف 18 رنز (16 گیندیں) بنانے کے بعد ریٹائرمنٹ لی تھی، تاہم نمیبیا فل ممبر ٹیم نہیں ہے۔