سندھ کے وزیر اعلیٰ سید مراد علی شاہ نے کراچی میں سیلابی صورتحال پر اہم پریس کانفرنس میں بتایا کہ پنجند میں 6 لاکھ کیوسک پانی کا بہاؤ ہے، اور ہم 8 لاکھ کیوسک تک پانی سے نمٹنے کے لیے تیاری کر رہے ہیں۔

وزیراعلیٰ سندھ  نے پریس کانفرنس میں سندھ کے مختلف علاقوں کی صورتحال سے متعلق اہم معلومات فراہم کیں۔

مراد علی شاہ نے کہا کہ لاڑکانہ اور سکھر کے کمشنرز سے آج بریفنگ لی ہے۔ سندھ میں اس وقت مون سون بارشوں کے نتیجے میں سیلابی صورتحال کا سامنا ہے۔

وزیراعلیٰ سندھ نے سیلاب کے عروج کے حوالے سے کہا کہ 9 ستمبر تک گڈو بیراج پر سیلابی پانی عروج پر ہو گا، جس سے مزید مشکلات کا سامنا ہو سکتا ہے۔

انہوں نے کراچی کی صورتحال پر بھی بات کی اور کہا کہ کراچی میں اس وقت توقع سے زیادہ بارشیں ہو رہی ہیں، جس کے باعث سیلابی صورتحال مزید پیچیدہ ہو سکتی ہے۔

مراد علی شاہ نے بتایا کہ سکھر اور دیگر اضلاع کی انتظامیہ مکمل طور پر الرٹ ہے، اور سیلاب متاثرین کی امداد ہر صورت یقینی بنائی جا رہی ہے۔

سیلاب متاثرہ علاقوں میں کیمپ، ادویات اور خوراک کی فراہمی کے حوالے سے بھی وزیراعلیٰ سندھ نے تفصیل سے بتایا کہ اب تک 3 لاکھ 24 ہزار لوگوں کا انخلا کر چکے ہیں، اور سندھ انتظامیہ اور ریسکیو 1122 فیلڈ میں موجود ہیں۔

اس موقع پر مراد علی شاہ نے اپنے خلاف جاری مقدمات کے بارے میں بھی بات کی اور کہا کہ الیکشن کمیشن اور سپریم کورٹ سے کیسز جیت چکا ہوں۔ کچھ کیسز پر نظرثانی کی اپیلیں بھی ہیں، لیکن مجھے کوئی پریشانی نہیں۔

انہوں نے مزید کہا کہ میرے خلاف جھوٹی خبریں چلائی جا رہی ہیں، جن پر میں کچھ نہیں کہہ سکتا۔

وزیراعلیٰ سندھ نے عوام کو یقین دلایا کہ سندھ حکومت سیلاب متاثرین کی امداد کی فراہمی اور حالات کو بہتر بنانے کے لیے تمام ضروری اقدامات کر رہی ہے۔