گیمز،تھیٹرشو،فلمی اسکرینز اوربہت کچھ،سعودی دارالحکومت  میں جاری ریاض سیزن میں محکمہ تفریحات کی جانب سے اپنی نوعیت میں منفرد ونٹرونڈر لینڈ کا شاندار افتتاح کردیا گیا۔

عرب میڈیا کی رپورٹ کے مطابق سعودی دارالحکومت میں ریاض سیزن جاری ہے۔محکمہ تفریحات نے اس کے تحت ’ونٹر ونڈر لینڈ‘ کا افتتاح کردیا گیا۔ یہ مشرق وسطیٰ کی تاریخ میں پہلی بار ہے۔

پچاس ایکڑ کے رقبے پر پھیلے اس شاندار ونٹر ونڈر لینڈ میں مختلف اقسام  کے 42 کھیلوں کا اہتمام کیا گیا ہے۔ ہر عمر کے افراد کے ذوق اور معیار کو سامنے رکھ کر شو کا اہتمام کیا گیا ہے۔

مشرق وسطیٰ کے سب سے بڑے اسکیٹنگ کا بھی انتظام کیا گیا ہے۔ علاوہ ازیں گیمز سٹی ، تھیٹر شو، مارول کی دنیا، ہلکے پھلکے گیمز اور برفانی پارک جیسے کھیل سے شائقین دل بہلا رہے ہیں۔

ریاض ونٹر ونڈر لینڈ میں ہر روزرات میں آتش بازی کا بھی شاندار مظاہرہ کیا جائے گا۔

ونٹر ونڈر لینڈ میں ’لونا سینما‘ کی دیو ہیکل اسکرین بھی نصب کی گئی ہے۔ جس میں نئی فلمیں دکھائی جارہی ہیں۔ شائقین کھلی ہوا میں لگائی گئی کرسیوں اور بنچوں پر بیٹھ کر فلمیں دیکھ رہے ہیں۔

’ونٹر ونڈرلینڈ‘ آنے والے شائقین کی دلچسپی کے لیے ’بوجھو تو جانیں‘ پروگرام بھی رکھا گیا ہے جس میں مختلف پہیلیوں کے شائقین سے فوری جواب طلب کیے جائیں گے۔

یاد رہے کہ سعودی جنرل انٹرٹینمنٹ اتھارٹی کے چیئرمین اور ریاض سیزن کے سربراہ ڈاکٹر ترکی آل شیخ نے سماجی رابطہ کی ویب سائٹ ٹوئٹر پر لکھا  تھا ’عاطف اسلم اور راحت فتح علی خان 25 اکتوبر کو ہمارے پاکستانی اور انڈین بھائیوں اور بہنوں کا ریاض میں انتظار کریں گے۔‘

واضح رہے کہ 11 اکتوبر سے 15 دسمبر تک 70 روز جاری رہنے والے ریاض سیزن میں دنیا بھر سے آنے والے ثقافتی طائفے اور تفریحی ٹیمیں حصہ لے رہی ہیں۔