آصف درانی

کیا طالبان خواتین کے ساتھ کاروبار کرنے کو تیار ہیں؟

مُصنف سابق سفیر ہیں اور فی الحال اسلام آباد پالیسی ریسرچ انسٹیٹیوٹ میں بطور سینیئر ریسرچ فیلو کام کر رہے ہیں

وزیر مملکت حنا ربانی کھر کے ایک روزہ دورہ کابل نے بین الاقوامی میڈیا کی توجہ حاصل کی۔ کابل کے ہوائی اڈے پر ہوائی جہاز سے اترنے کے بعد اور طالبان کے معززین سے ملاقاتوں کے دوران ان کا رویہ میزبان طالبان کے لیے چونکا دینے والا رہا ہوگا۔ علامتی طور پر، حنا ربانی کھر کے دورے نے پاکستان کو یہ پیغام دیا کہ ریاستی امور کو مہارت سے چلانا کسی ایک صنف سے مخصوص نہیں ہے۔ ایک ریاست کو اپنے شہریوں کے حقوق اور مراعات کا احترام کرنا ہوتا ہے اور یہ کہ خواتین ریاست کے معاملات چلانے کی یکساں صلاحیت رکھتی ہیں۔

کابل میں وزیر مملکت نے قائم مقام وزیر خارجہ امیر خان متقی، نائب وزیر اعظم عبدالسلام حنفی، وزیر معدنیات و پیٹرولیم شہاب الدین دلاور اور عبوری افغان حکومت کے وزیر تجارت حاجی نورالدین عزیزی سے ملاقاتیں کیں۔ شہباز شریف کی حکومت آنے کے بعد یہ کسی بھی پاکستانی وزیر کا پہلا دورہ تھا۔

یہ دورہ کئی لحاظ سے اہم تھا۔ دفتر خارجہ کی ایک پریس ریلیز میں کہا گیا ہے کہ حنا ربانی کھر نے “عالمی برادری کے لیے اس بات پر زور دیا کہ وہ افغانستان کی سنگین انسانی صورتحال اور تعمیر نو اور سماجی و اقتصادی ترقی کے چیلنجوں سے نمٹنے میں مدد کے لیے عبوری افغان حکومت کے ساتھ عملی طور پر مشغول ہوں۔” انہوں نے اس بات پر بھی زور دیا کہ ’’افغانستان کے مالیاتی اثاثوں کو غیر منجمد کرنے سے اس مقصد میں مدد ملے گی۔‘‘

دوطرفہ بات چیت میں تعلیم، صحت، تجارت اور سرمایہ کاری، علاقائی روابط، عوام سے عوام کے درمیان رابطوں اور سماجی و اقتصادی منصوبوں میں تعاون پر تبادلہ خیال کیا گیا۔

رابطے کے نقطہ نظر سے، دونوں فریقوں نے وسطی ایشیا اور جنوبی ایشیا کے درمیان ایک ‘ زمینی پل ‘ کے طور پر افغانستان کی اہمیت اور علاقائی رابطوں کو بشمول نقل و حمل کے روابط اور TAPI اور CASA-1000 جیسے میگا توانائی کے منصوبوں کے ذریعے فروغ دینے میں اس کے اہم کردار پر بھی زور دیا۔ ایسے اشارے مل رہے ہیں کہ طالبان کی حکومت ان نیم مردہ منصوبوں میں جان ڈالنے اور انفرااسٹرکچر کو بہتر بنانے کی طرف مائل ہے جو پاکستان کو وسطی ایشیائی ریاستوں سے جوڑ سکتے ہیں۔

اس سے نہ صرف طالبان کے خزانے میں اضافہ ہوگا، بلکہ اقتصادی سرگرمیاں بھی پیدا ہوں گی، جس کی پاکستان ’جیو اکنامکس‘ کے تحت  گزشتہ سال سے اپیل کررہا ہے۔ چونکہ طالبان کے دور حکومت میں افغانستان، میں تقابلی طور پر امن آیا ہے اس لیے اس سے سرمایہ کاروں کو آگے بڑھنے اور TAPI اور CASA-1000 منصوبوں کو مکمل کرنے کا اعتماد حاصل ہوسکتا ہے- یہ ایک ایسا اقدام ہے جو خطے کو اقتصادی طور پر مربوط کرنے کا پیش خیمہ ہو سکتا ہے۔

اس میں کوئی شک نہیں کہ اقتصادی طور پر جنوبی ایشیا دنیا کا سب سے کم مربوط خطہ ہے۔ ہندوستان جنوبی ایشیائی علاقائی تعاون کی تنظیم (سارک) کا سب سے بڑا رکن ہے۔ یہ دوسرے تمام رکن ممالک کا ہمسایہ ہے۔ ہندوستان کو جو جغرافیائی فائدہ حاصل ہے اس سے اچھی طرح سے مربوط رابطے کے ذریعے مثبت توانائی حاصل کرنی چاہیے تھی۔ تاہم، یہ ایک بڑا خواب رہا ہے کیونکہ اپنے پڑوسیوں پر تسلط حاصل کرنا ہمیشہ ہندوستانی جغرافیائی سیاست کا حصہ رہا ہے، جس سے خطے کو کوئی فائدہ حاصل نہیں ہوا۔ دیکھنا ہوگا کہ کیا ہندوستان TAPI پروجیکٹ کے سلسلے میں کیے گئے اپنے عہد کا احترام کرنے کے لیے تیار ہے یا پھر وہ پیچھے ہٹ جائے گا جیسا کہ اس نے ایران-پاکستان-بھارت گیس پائپ لائن منصوبے کے ساتھ کیا تھا۔

تاہم، ایک مثبت پیش رفت ہوئی ہے۔ جب کہ افغانستان معمول کی طرف لوٹ رہا ہے 2021 ء میں افغانستان کے راستے وسطی ایشیا کی ریاستوں کے ساتھ پاکستان کی تجارت پہلے ہی 202 ملین ڈالر تک پہنچ چکی ہے، جو پچھلے سال کے مقابلے میں 70 فیصد زیادہ ہے۔ اسی طرح افغانستان کے ساتھ تجارت میں بھی تیزی آئی ہے۔ گزشتہ سال کے دوران تجارت ڈیڑھ ارب ڈالر تک پہنچ گئی ہے، تجارت کا توازن افغانستان کے حق میں ہے۔ افغان برآمدات پاکستان سے 700 ملین ڈالر کی درآمدات کے مقابلے میں 800 ملین ڈالر تھیں۔ افغان تجارت میں اضافے کی بنیادی وجہ جنوبی افریقہ اور انڈونیشیا میں اجناس کی قیمتوں میں اضافے کی وجہ سے پاکستان کو افغان کوئلے کی درآمد بتائی جاتی ہے۔

سوئس بینک آف انٹرنیشنل سیٹلمنٹس کے زیر انتظام کم از کم ساڑھے تین ارب ڈالر کو غیر منجمد کرنے اور تیسرے فریق کے نگرانی کے نظام کے تحت رقم تقسیم کرنے کا امریکی فیصلہ طالبان حکومت کے ساتھ کاروبار کرنے کا پیش خیمہ ہو سکتا ہے۔ القاعدہ کے سربراہ ایمن الظواہری کی ہلاکت کی وجہ سے شرمندگی اٹھانے کے بعد طالبان افغانستان میں داعش اور القاعدہ کے دوبارہ منظم ہونے کے حوالے سے امریکی خدشات کو دور کرنے کے لیے زیادہ ہوشیار نظر آتے ہیں۔ تاہم، بائیڈن انتظامیہ کی جانب سے اس عمل میں طالبان حکومت کو شامل کرنے کے لیے جھکاؤ ظاہر کرنے میں کچھ وقت لگے گا۔ طالبان کو یہ تسلیم کرنا ہوگا کہ داعش اور القاعدہ کو بے اثر کرنے کی ان کی صلاحیت اب بھی محدود ہے اور انہیں بین الاقوامی مدد کی ضرورت ہوگی۔ وہ جتنی جلدی امریکہ یا دیگر ذرائع سے اس طرح کی مدد حاصل کریں گے اتنا ہی جلد افغانستان کی معمول پر واپسی کی راہ ہموار ہوگی۔

ایک اور اہم پیش رفت جس نے افغانستان پر نگاہ رکھنے والوں کی توجہ حاصل کی وہ وزیر مملکت کی خواتین کے چیمبر آف کامرس کی نمائندگان کے ساتھ ظہرانے کی ملاقات تھی۔ ملاقات کے دوران، انہوں نے ’’افغان معاشرے میں خواتین کے اہم کردار پر زور دیا اور پاکستان اور افغانستان کی  کاروباری خواتین کے درمیان روابط کو مضبوط بنانے کے لیے پاکستان کی گہری خواہش کا اظہار کیا۔” انہوں نے اعلان کیا کہ ’’پاکستان افغان کاروباری خواتین کی مصنوعات کی درآمد کو خصوصی ترجیح دے گا۔‘‘ یہ ایک خوشگوار حیرت کی بات تھی کہ کئی افغان کاروباری خواتین نے ایک پاکستانی وزیر، حنا ربانی کھر کے ساتھ کاروباری امور پر گفت و شنید کی۔ یہ واضح نہیں ہے کہ آیا اس طرح طالبان بین الاقوامی برادری کو یہ باور کرانا چاہتے تھے کہ وہ خواتین کے کاروبار کرنے کے مخالف نہیں ہیں۔ تاہم، خواتین کے ساتھ سخت سلوک کے طالبان کے ریکارڈ کو دیکھتے ہوئے، کاروباری خواتین کو عالمی سطح پر مشہور پاکستانی خاتون وزیر کے ساتھ بات چیت کرنے کی اجازت دینا طالبان کے رویے میں تبدیلی کی عکاسی کرتا ہے، جو کہ ایک مثبت پیش رفت ہے۔

دو طرفہ نقطہ نظر سے، تحریک طالبان پاکستان (ٹی ٹی پی) کے افغانستان میں پناہ لینے کے دوران سرحد کے ساتھ پاکستانی سیکیورٹی فورسز پر حملوں کے حوالے سے پاکستان کے تحفظات سنگین ہو گئے ہیں۔ اگر افغان طالبان اپنے پاکستانی ‘ نظریاتی کزنز ‘ کے بارے میں لاپرواہی کا رویہ برقرار رکھتے ہیں تو اس کے شدید اثرات ہو سکتے ہیں۔ دریں اثنا،  حناربانی کھر کے دورے کے موقع پر ٹی ٹی پی کا جنگ بندی ختم کرنے کا اعلان افغان طالبان کے ساتھ کی گئی مصالحتی کوششوں کے لیے اچھا نہیں ہے۔

اس سال، ٹی ٹی پی کے حملوں میں اضافہ ہوا اور 450 افراد ہلاک ہوئے، جن میں سے بیشتر سیکیورٹی فورسز کے اہلکار تھے۔ ٹی ٹی پی کا نیا اعلان سرحدی علاقوں اور ان سے باہر موت اور تباہی پھیلانے کا سبب بن سکتا ہے۔ اس لیے پاکستانی حکام کو ٹی ٹی پی کی سرگرمیوں کو بے اثر کرنے کے لیے ٹھوس اقدامات کرنے ہوں گے۔ ٹی ٹی پی اس وقت تک کسی رعایت کی مستحق نہیں جب تک وہ غیر مشروط طور پر ہتھیار نہ ڈال دے۔ جبری طاقت کے استعمال کا حق صرف ریاست کے پاس ہے۔ کسی سیاسی یا مذہبی گروہ کو ہتھیار اٹھانے کی اجازت نہیں دی جا سکتی۔ ٹی ٹی پی کے اصل چہرے کو بے نقاب کرنے کی ایک بڑی مہم اور عوامی تحریک، جو چند ہفتے قبل سوات اور مالاکنڈ میں ہوئی، مذہبی تعصب کا مؤثر جواب دے سکتی ہے۔