مسلم لیگ (ن) کی نائب صدر مریم نواز نے احتساب عدالت کے جج ارشد ملک کوہٹانے کے فیصلے پر کہا ہے کہ عدالت اب ارشد ملک کے سابق وزیراعظم نواز شریف کے فیصلے کو بھی کالعدم قرار دے۔

تفصیلات کے مطابق مریم نواز نے ٹویٹر پر اپنے بیان میں کہا ہے کہ عدالت نواز شریف کو انصاف فراہم کرتے ہوئے فوری طور پر رہا کرے،معاملہ نواز شریف تک محدود نہیں رہا،انصاف کے لیےاعلیٰ عدلیہ کی طرف دیکھ رہی ہوں۔

مریم نواز کا کہناتھا کہ جج ارشد ملک کے بیان حلفی میں لگائے گئے الزامات میں رتی برابر بھی سچائی ہوتی تو دوران مقدمہ، عدالت میں نواز شریف کاسامنا کرتے اور کہتے کہ جواب دیں، آپ مجھے کیوں رشوت کی پیشکش کررہے ہیں۔ جج ارشد ملک اعلیٰ عدلیہ کو مطلع کرتے اور جج کو دباؤ میں لانے پر بھری عدالت میں گرفتاری کا حکم صادر فرماتے۔

اللّہ کا شکر!
مگر معاملہ کسی جج کو معطل کئے جانے کا نہیں۔
اس فیصلے کو معطل کرنے کا ہے جو اس جج نے دیا
معاملہ کسی جج کو عہدے سے نکالنے کا نہیں۔
اس فیصلے کو عدالتی ریکارڈ سے نکالنے کا ہے
جو اس جج نے دباؤ میں دیا۔
معاملہ کسی جج کو فارغ کرنے کا نہیں
اس کے فیصلے کو فارغ کرنے کا ہے

Advertisement

— Maryam Nawaz Sharif (@MaryamNSharif) July 12, 2019

مریم نواز نے ارشد ملک پرتنقید کرتے ہوئے کہاکہ جج صاحب ہر کسی سے ہنسی خوشی ملتے رہے،کسی کو اپنی سرکاری گاڑی بھیج کر اپنے ذاتی گھر بلاتے رہے، اور کسی سے خود ان کے دفتروں اور گھروں میں جاکرکہتےرہےکہ مجھے دباؤ میں لاؤ اور بلیک میل کرو۔

مریم نواز کامزید کہناتھا کہ جج کو فارغ کرنے کا واضح مطلب یہ ہےکہ عدالت نےحقائق کو تسلیم کرلیا ہے۔اگر ایسا ہی ہے تو وہ فیصلہ کیسے برقرار رکھاجارہا ہےجو اس جج نے دیا ؟ اگر فیصلہ دینے والے جج کو سزا سنا دی ہےتو اس بےگناہ نواز شریف کو کیوں رہائی نہیں دی جارہی جس کو اسی جج نے سزا دی؟

مسلم لیگ (ن) کی نائب صدرکا کہناتھا کہ سازش اور ظلم کرنے والے یہ کیوں بھول جاتے ہیں کہ اللّہ دیکھ رہا ہے اور سب سے بڑی اور کامیاب تدبیر اللّہ ہی کی ہے۔ پوری ریاست ایک شخص سے انتقام لینے پر تلی ہوئی تھی مگر کس کو عزت دینا ہے اور کس کو ذلت، یہ فیصلے اللّہ کے ہیں۔