وزیراعظم کی معاون خصوصی فردوس عاشق اعوان نے کہا ہے کہ پاکستان ہاؤسنگ منصوبہ عوام کو اپنی چھت دلانے کا خواب پورا کرنے کی جانب وزیراعظم کا عملی قدم ہے۔

تفصیلات کے مطابق وزیراعظم کی معاون خصوصی فردوس عاشق اعوان نے اپنے ٹویٹربیان میں کہا ہے کہ پاکستان ہاؤسنگ منصوبہ عوام کو اپنی چھت دلانے کا خواب پورا کرنے کی جانب وزیراعظم کا عملی قدم ہے، کمزوراورتنخواہ دارطبقے کیلئے یہ اسکیم انہیں نیا اعتماد دے رہی ہے،ان کی امیدوں کی تکمیل کا ذریعہ بن رہی ہے۔

ان کا کہنا تھا کہ پاکستان ہاؤسنگ اسکیم تعمیرات سے متعلق کئی دوسری صنعتوں کے فروغ کا بھی ذریعہ بنے گی، یہ نئے روشن پاکستان اور فلاحی ریاست کے قیام کی جانب ایک اہم اقدام ہے۔

فردوس عاشق اعوان نے کہا کہ عمران خان ایسی ریاست کے قیام کی بنیاد ڈالنا چاہتے ہیں جو شہریوں کے تحفظ اور بہتری کا بیڑا اٹھائے، جوحکمرانوں کے مفاد کے بجائے عوام کے حقوق کی نگہبان ہو۔