پاکستان ریلوے کی جانب سے کراچی کے لئے نئی تیزرفتار ٹرین “سرسید ایکسپریس” کا تحفہ تیارکرلیا گیا۔ پاکستان ریلوے کا گرین لائن طرز پر کراچی  کے لئے نئی سبک رفتار ٹرین “سر سید ایکسپریس” چلانے اعلان کیا گیاہے۔

وزیرِ اعظم عمران خان آج شام پانچ بجےراولپنڈی میں سرسید ایکسپریس کا افتتاح کریں گے۔ افتتاحی تقریب میں وزیر اعظم عمران خان اور وفاقی وزیر ریلوے شیخ رشید خطاب بھی کریں گے۔ وفاقی وزیر ریلوے شیخ رشید آج 10 ماہ میں 12 نئی مسافر ٹرینیں چلانے کا ریکارڈ قائم کریں گے۔

 راولپنڈی سے کراچی کے لئے “سرسید ایکسپریس “پہلی بارکل دوپہر ڈھائی بجے روانہ ہوگی جس میں وائی فائی ، ٹی وی، ڈائننگ کار اور عام کھانے پینے کی سہولتیں مسافروں کو ٹرین کے اندر دستیاب ہوں گی۔

ذرائع کے مطابق سرسید ایکسپریس راولپنڈی سےروزانہ دوپہر ڈھائی بجے روانہ ہوگی اور اگلے دن بارہ بجے کراچی پہنچے گی۔ سرسید ایکسپریس کراچی سے روزانہ رات 9 بجے روانہ ہوگی اور اگلے روز شام 6 بجے راولپنڈی پہنچے گی۔

سرسید ایکسپریس راولپنڈی سے براستہ فیصل آباد21 گھنٹے میں کراچی پہنچا کرےگی۔ ٹرین میں عام مسافر اب دو ہزارروپے کا ٹکٹ لیں گے اور راولپنڈی سے کراچی اکانومی کلاس میں تیز سفر کے مزے لیں گے۔

سرسید ایکسریس میں اکانومی کلاس کی بکنگ کرانے پر کرایہ 2 ہزارروپے جبکہ موقع پر ٹکٹ لینے پر کرایہ 21 سوروپے وصول کیا جائے گا ۔اس طرح اے۔سی سلیپر کی بکنگ کرانے پرکرایہ 8 ہزارروپے فی سواری مقررکردیاگیاجبکہ موقع پرٹکٹ ساڑھے 8 ہزار روپے میں ملے گا۔ سرسید ایکسپریس میں بزنس کلاس کی بکنگ پرکرایہ ساڑھے 6 ہزار اور موقع پر ٹکٹ سات ہزار میں ملے گا۔