وزیراعظم کے معاون خصوصی زلفی بخاری اور ایوانکا ٹرمپ کے درمیان اہم ملاقات ہو ئی،جس میں پاکستان اورامریکا کے درمیان مختلف شعبوں میں تعاون پراتفاق کیا گیا۔

ایوانکا ٹرمپ امریکی صدر کی بیٹی اور مشیر خاص ہیں،زلفی بخاری اور ایوانکا کے درمیان ملاقات میں روزگار کی فراہمی، تکنیکی تربیت، معاشی ترقی کے منصوبوں اور نوجوانوں کے لیے کاروباری مواقع کے فروغ پر بھی تبادلہ خیال کیا گیا۔

ایوانکا ٹرمپ نے خواتین کی فلاح و بہبود پرپاکستان میں منصوبے شروع کرنے کی خواہش کا اظہار کیا۔

اس موقع پر وزیراعظم کے معاون خصوصی زلفی بخاری نے کہا کہ پاکستانی خواتین کو با اختیار بنانے میں دلچسپی پر شکرگزار ہیں، پاک امریکا مشترکہ تعاون سے انسانی ترقی کے مواقع پیدا ہوں گے۔

زلفی بخاری نے کہا کہ مرد و خواتین کو آگے بڑھنے کے یکساں مواقع مل سکیں گے، پاک امریکا تعلقات درست سمت میں بڑھنا شروع ہو گئے ہیں،دونوں ممالک کے درمیان سفارتی محاذ پرمزید کامیابیاں ملیں گی۔

واضح رہے کہ وزیراعظم عمران خان کے دورہ امریکا کے بعد ، پاک امریکا سفارتی محاذ پر کامیابیاں ملنے کا آغاز ہو گیا ہے، امریکا نے پاکستان کے ایف 16طیاروں کے لیے تکنیکی اور لاجسٹک سپورٹ کا اعلان بھی کردیا ہے۔