وزیر اعظم عمران خان کا کہنا ہے کہ مشکل معاشی حالات میں حکومت نے متوازن بجٹ پیش کیا ہے۔

تفصیلات کے مطا بق وزیراعظم عمران خان سے وزیراعلیٰ پنجاب سردار عثمان بزدار  نے وزیرمنصوبہ بندی مخدوم خسرو بختیار، مشیر خزانہ ڈاکٹر عبدالحفیظ شیخ، مشیر تجارت عبدالرزاق داؤد ، صوبائی وزیرخزانہ مخدوم ہاشم جوان بخت اور صوبائی وزیرصنعت پنجاب میاں محمد اسلم اور چیئر مین ایف بی آر شبر زیدی  سمیت وزیر اعظم آفس میں ملاقات کی۔

ملاقات میں پنجاب میں صنعتی شعبے، زراعت اور سیاحت کے فروغ، خصوصی اقتصادی زونز کے قیام اور کاروباری طبقے کو درپیش مسائل کے حل کے سلسلے میں اٹھائے جانے والے اقدامات پرعمران خان نے بریفنگ دی ۔

وزیراعظم  نےچیئر مین ایف بی آر سمیت معاشی ٹیم کو مختلف کاروباری تنظیموں سے ملاقات کرنے اور معاشی و ٹیکس نظام میں اصلاحات سے تفصیلی طور پر آگاہ کرنے کی ہدایت کی۔

وزیر اعظم کا کہنا تھا کہ وہ چاہتے ہیں کاروباری برادری سمیت تمام طبقے از خود معاشی ترقی کے عمل میں حصہ دار بنیں ۔

انہوں نےکہا کہ  مشکل معاشی حالات میں حکومت نے متوازن بجٹ پیش کیا ہے جس میں صنعتی شعبے کا فروغ اور کمزور طبقے کے تحفظ پرپوری توجہ دی گئی ہے۔

وزیراعظم کا یہ بھی کہنا تھا کہ کاروباری برادری کے تحفظات کا مکمل ادراک ہے، مشکل فیصلوں کا مقصد ملک کومعاشی مشکلات سے نکالنا ہے ۔