آشیانہ اقبال کیس میں احتساب عدالت نے اپوزیشن لیڈر شہباز شریف کی حاضری سے استثنیٰ کی درخواست منظور کرتے ہوئے کیس کی سماعت چوبیس جولائی تک ملتوی کردی ہے۔

احتساب عدالت میں آشیانہ اقبال اسکینڈل کیس کی سماعت ہوئی،جہاں سابق ڈی جی ایل ڈی اے احد خان چیمہ اور فواد حسن فواد سمیت دیگر ملزمان عدالت کے رو برو پیش ہوئے جبکہ کمر میں تکلیف کے باعث شہبازشریف کے وکلا کی جانب سے حاضری  سے استثنیٰ کی درخواست دائر کی گئی جو عدالت نے منظور کرلی ۔

دوران سماعت شہباز شریف اور دیگر ملزمان کے وکلا نے ہڑتال کے باعث کیس ملتوی کرنے کی استدعا کی، جس پر قاضی مصباح الحسن ایڈووکیٹ نے موقف اختیار کیا کہ آشیانہ اقبال اسکینڈل کا کیس ہفتے میں دو بار سماعت کے لئے مقرر ہوا ہے،اگر اس کیس کو روزانہ کی بنیاد پر سنا جانا ہے تو بھی بتایا جائے تعاون کریں گے،لیکن نیب کی جانب سے تاخیر کی جاتی ہے، گواہ پیش نہیں کئے جاتے، یہ عمل بدنیتی پر مبنی ہے،آج بھی وکلا ہڑتال کے باعث پراسیکیوشن کے گواہوں کے بیانات ریکارڈ نہ ہو سکے۔