وزیرِ خارجہ شاہ محمود قریشی نے سری لنکن وزیرِ خارجہ تلک ماراپانا سے ٹیلیفونک رابطہ کیا ہے۔

تفصیلات کے مطابق وزیرخارجہ شاہ محمود قریشی نے سری لنکن وزیر خارجہ تلک ماراپانا سے ٹیلفونک رابطہ میں انہیں مقبوضہ جموں وکشمیر میں جاری انسانی حقوق کی سنگین خلاف ورزیوں اور خطے میں امن و امان کی مخدوش صورتحال پرآگاہ کیا۔

شاہ محمود نے اپنے ہم منصب کو بتایا کہ ہندوستان نے یکطرفہ ،غیرقانونی اقدامات سے مقبوضہ جموں و کشمیر کی خصوصی حیثیت ختم کر دی ہے اور وادی میں جبرا آبادیاتی تناسب کو تبدیل کرنا چاہتا ہے

وزیرِ خارجہ کا کہنا تھا کہ ہندوستان کے مقبوضہ جموں و کشمیر میں یکطرفہ اقدامات بین الاقوامی قوانین اور اقوام متحدہ سیکیورٹی کونسل کی قراردادوں کی صریحاً خلاف ورزی ہیں۔

شاہ محمود نے سری لنکن وزیر خارجہ کو آگاہ کیا کہ پانچ اگست سے مقبوضہ جموں و کشمیر کے نہتے مسلمانوں کو مسلسل کرفیو کا سامناہے جبکہ بین الاقوامی میڈیا اور انسانی حقوق کی عالمی تنظیموں نے مقبوضہ جموں و کشمیر میں بھارت کی جانب سے سنگین خلاف ورزیوں کا پردہ چاک کر دیا ہے۔

اس موقع پر سری لنکن وزیر خارجہ کا کہنا تھا کہ ہم پاکستان کے ساتھ دو طرفہ تعلقات کو خاص اہمیت دیتے ہیں۔

ٹیلی فونک گفتگو میں سری لنکن وزیر خارجہ تلک ماراپانا نے شاہ محمود قریشی کو دورہ سری لنکا کی دعوت دیتے ہوئے کہا کہ وزیر خارجہ کے جلد دورہ سری لنکا کے منتظر ہیں۔

اس سے قبل وزیر خارجہ شاہ محمود قریشی نے نیوزی لینڈ کے نائب وزیرِ اعظم ونسٹن پیٹر سے بھی ٹیلی فون پر رابطہ کیا تھا۔نیوزی لینڈ کے نائب وزیرِ اعظم ونسٹن پیٹر نے مقبوضہ کشمیر کی صورتِ حال پر تشویش کا اظہار بھی کیا تھا۔