کھارادر میں پرانی عمارت کی چھت گرنے سے میاں بیوی جاں بحق ہوگئے ہیں جب کہ ان کی 2 کم سن بیٹیاں زخمی ہوگئیں ہیں۔

تفصیلات کے مطابق کراچی کے علاقے کھارا در میں ایک مخدوش عمارت کی چھت گر گئی، جس کے نتیجے میں عمارت میں رہائش پذیر خاندان اس کی زد میں آگیا،حادثے میں میاں بیوی جان کی بازی ہار گئے ۔

واقعہ کی اطلاع ملتے ہی ایدھی ایمبولینس، پولیس اور فائر بریگیڈ کی گاڑیاں موقع پر پہنچیں اور علاقہ مکینوں کی مدد سے امدادی کام شروع کیا۔

رضا کاروں نے ایک الماری کے نیچے دبی دو بچیوں کو بحفاظت نکال کر سول اسپتال منتقل کیا، جہاں انھیں طبی امداد فراہم کی جارہی ہے۔

پولیس کے مطابق زخمی ہونے والے بچیوں کی شناخت 10 سالہ زینب دختر اکرم اور 8 سالہ ثنیہ کے نام سے ہوئی ہیں۔

ایس ایچ او کھارادر انسپکٹر نے بتایا کہ جاں بحق میاں بیوی کا آبائی تعلق پنجاب سے تھا، دیوی بائی بلڈنگ 100 سال سے زائد پرانی ہے جسے کافی عرصہ قبل مخدوش قرار دے دیا گیا تھا اور مذکورہ خاندان کو عمارت خالی کرنے کو کہا گیا تھا لیکن وہ لوگ غربت کے باعث وہاں رہائش پزیر تھے۔