پاکستان مسلم لیگ (ن) کی ترجمان مریم اورنگزیب نے کہا ہے کہ وزیراعلی پنجاب ، وزیر اور مشیر ڈینگی کے مریضوں کی اطلاع دینے کے بجائے نااہلی اور نالائقی پر استعفی دیں۔ 

تفصیلات کے مطا بق مسلم لیگ ن کی ترجمان مریم اورنگزیب کا کہنا تھا کہ وزیراعلیٰ پنجاب ڈینگی مریضوں کی اطلاع دینے کے بجائے مستعفی ہوں، پہلی حکومت ہے جو اپنی نااہلی کا خود چرچا کر رہی ہے، وزیراعلی عثمان بزدار ‎افسران کو معطل کر کے مجرمانہ غفلت چھپا رہے ہیں۔

مریم اورنگزیب نے کہنا ہے کہ ساری دنیا کو پتہ ہے کہ ملک میں ڈینگی کے مریضوں کی تعداد 10 ہزار ہوچکی ہے، حکومت کو اب اطلاع ہوئی، شکر ہے کہ آج اعداد و شمار تو تسلیم کئے گئے، ورنہ نالائق حکومت مسلسل انکار کررہی تھی، عوام کی طرح ڈینگی کے مریضوں کا بھی کوئی پرسان حال نہیں،نالائق اور بے حس حکوت نے شہباز شریف کے حسد میں اُن کے ڈینگی سے بچنے کا پروگرام بھی بند کر دیا، نالائق حکومت کے پاس نہ معاشی ، نہ کاروباری اور نہ ہی ڈینگی کی روک تھام کا پلان ہے۔

ان کا کہنا تھا کہ  ‎وزیراعلیٰ، وفاقی وصوبائی وزرا ہسپتالوں میں دفاتر کھولیں، ڈینگی سے متعلق پورے ملک میں ایمرجنسی نافذ کی جائے، شہبازشریف دور کی بنائی گئی ہیلپ لائن چو بیس گھنٹے کھولی جائے، ‎سرکاری خرچ پر بیانات سے ڈینگی کا خاتمہ نہیں ہو گا۔

واضح ہے کہ ملک میں ڈینگی سےمتاثرہ مریضوں کی تعدادمیں خطرناک حدتک اضافہ ہوا اور تعداد 13 ہزار تک پہنچ گئی، جبکہ حال ہی میں متاثرہ ہونے والے 18 افراد دورانِ علاج جاں بحق ہوئے۔

تازہ ترین رپورٹ کے مطابق ملک بھرسے24گھنٹوں کےدوران ڈینگی کے497کیسزرپورٹ ہوئے جبکہ خیبرپختونخواہ میں سب سے زیادہ 169 مریض متاثر ہوئے۔

خیبرپختونخواہ میں ڈینگی کےمریضوں کی تعداد1814ہوگئی جبکہ پنجاب میں2410 افرادکو ڈینگی وائرس نےمتاثرکیا، اسی طرح اسلام آباد میں ڈینگی سےمتاثرہ مریضوں کی تعداد1505ہوئی، سندھ میں24گھنٹوں کےدوران67مریضوں میں ڈینگی وائرس کی تصدیق ہوئی۔