فردوس عاشق اعوان نے کہاکہ سندھ حکومت عوام کو سہولیات پہنچانے میں ناکام ہوچکی ہے، سندھ کو نانا جی کی ملکیت سمجھنے والے کچرے پرسیاست کررہے ہیں۔

تفصیلات کے مطابق معاون خصوصی اطلاعات ڈاکٹر فردوس عاشق اعوان نے پارلیمنٹ کے باہر میڈیا سے گفتگوکرتے ہوئے کہا کہ جمہوریت نے ایک سال مکمل کرلیا ہے، پاکستان بھر کے جمہوری سوچ زہن اور جمہوریت پر یقین رکھنے والی عوام کو مبارکباد دیتی ہوں۔

معاون خصوصی اطلاعات کا کہنا تھا کہ سندھ حکومت کی خراب کارکردگی کا خمیازہ کراچی کی عوام بھگت رہی ہیں۔ تحریک انصاف کے 14 ایم این ایز اور ایم پی ایز عوام کو کیسے ریلیف فراہم کریں جب صوبائی حکومت اس کے لئے تیار نہیں۔

فردوس عاشق اعوان کا یہ بھی کہنا تھا کہ کسی صوبے کو تقسیم کرنے کے حوالے غیرزمہ دارانہ بیان کی مزمت کرتی ہوں، زاتی مفادات کا تحفظ کرنے والوں نے اپنا اصل چہرہ بے نقاب کردیا ہے۔

وزیر اعظم پاکستان کی معاون خصوصی فردوس عاشق اعوان نے کہا کہ  صوبائی حکومت ہوش کے ناخن لےاور تصادم کی بجائےمفاہمت سے کام لیا جائے, عوامی فلاح کے لئے صوبائی حکومت وفاقی حکومت کے ساتھ ملکر لائحہ عمل مرتب کرے۔

 فردوس عاشق اعوان کا کہنا تھا کہ وزیر اعظم کل  اپنے خطاب میں اقوام متحدہ اجلاس سے قبل پاکستانی عوام کی آواز بن کر ہندوستان کے سیاہ چہرے کو دنیا کے سامنے لائیں گے۔

 فردوس عاشق اعوان کا یہ بھی کہنا تھا کہ یہ خطاب ایک ایسے موقع پہ ہورہا ہے جب کشمیریوں کے حق خودارادیت کے موقف کو پارلیمنٹ سے دنیا کے سامنے لانا ہے، پوری قوم یکجا ہو کر مظلوم کشمیریوں کے ساتھ کھڑی نظر آئے گی۔

 معاون خصوصی اطلاعات ڈاکٹر فردوس عاشق اعوان کا مزید کہنا تھا کہ یکجہتی کی آواز کشمیریوں کے ذخم پر مرہم رکھے گی، آج قوم توقع کرتی ہے سندھ کے نام پر سیاست کرنے والے وہاں کے مسائل پر لائحہ عمل سامنے لائیں گے۔