چیئرمین نیب جسٹس ریٹائر جاوید اقبال نے کہا ہے کہ میگا کرپشن مقدمات  کو منطقی انجام تک پہنچانا نیب کی اولین ترجیح ہے۔

تفصیلات کے مطابق چیئرمین نیب جسٹس (ر) جاوید اقبال نے اپنے ایک بیان میں کہا کہ ملک سے بدعنوانی کے خاتمہ کے لیے تمام اقدامات اٹھائے گئے ہیں۔

جسٹس ریٹائر جاوید اقبال کا کہنا تھا کہ نیب نے گزشتہ 22 ماہ کے دوران 71 ارب روپے قومی خزانے میں جمع کروائے اور نیب کی احتساب عدالتوں میں سزا دلوانے کی مجموعی شرح 70 فی صد ہے جو کسی بھی دوسرے اینٹی کرپشن ادارے کی نہیں ہے۔

چیئرمین نیب کا یہ بھی کہنا تھا کہ بدعنوانی کے 600 ریفرنس احتساب عدالتوں میں جمع کرائے گئے اور بدعنوانی کے 1200 ریفرنس نیب عدالتوں میں زیر سماعت ہیں جبکہ بدعنوان عناصر کو نیب کورٹس میں سزا دلوانے کی شرح 70 فیصد ہے۔

اپنے بیان میں جسٹس ریٹائر جاوید اقبال کا کہنا ہے کہ نیب قانون کے مطابق انسدا بدعنوانی کی پالیسی پر عمل پیرا ہے،غیر قانونی ہاؤسنگ سوسائٹیز سے اربوں روپے برآمد کرکے متاثرین کو واپس کیے جبکہ مضاربہ اور مشارقہ اسکینڈلز کے مقدمات کے 43 ملزمان کو گرفتار بھی کیا گیا۔

جسٹس ریٹائر جاوید اقبال کا یہ بھی کہنا تھا کہ نیب کے اس وقت 1210 بدعنوانی کے ریفرنس احتساب عدالتوں میں زیر التواء ہیں جن میں جلد سماعت کے لیے متعلقہ احتساب عدالتوں میں درخواستیں دائر کرنے کا فیصلہ کیا ہے۔

چیئرمین نیب جسٹس ریٹائر جاوید اقبال کا مزید کہنا تھا کہ نیب کی کارکردگی پر سروے میں 59 فیصد عوام نے نیب پراعتماد کا اظہار کیا ہے۔