وزیر خارجہ شاہ محمود قریشی نے کہا ہے کہ مودی سرکار کشمیریوں کو طاقت کے زور پر کچل رہی ہے، ایسا معلوم ہو رہا ہے کہ جیسے اکیسویں صدی میں ہٹلرکا زمانہ واپس آ گیا ہو۔ 

میڈیا سے گفتگو کرتے ہوئے شا ہ محمود قریشی کا کہنا تھا کہ  آج سعودی عرب اور یو اے ای کے وزرائے خارجہ پاکستان کے دورے پر آ رہے ہیں جن کا او آئی سی میں بڑا کردار ہے، ان کے سامنے میں مقبوضہ کشمیر کی آواز بنوں گا اور ان سے درخواست کروں گا کہ وہ اس مسئلے پر اپنا کردار ادا کریں۔

وزیر خارجہ کا کہنا تھا کہ ہرملک کے اپنے مفادات اور دوطرفہ تعلقات ہوتے ہیں، ہم نے ان کو بھی سمجھنا ہے، میں چاہتا ہوں دنیا کشمیر کے مسئلے پر آوازاٹھائے، مسئلہ کشمیر پربرطانیہ کی تاریخ کا بھارتی ہائی کمیشن کے سامنے کل سب سے بڑا مظاہرہ ہوا۔

انھوں نے کہا ہے کہ حزب اختلاف کے کچھ دوست سمجھتے ہیں کہ چٹکی میں سب کچھ ہوجاتا ہے، مسئلہ کشمیر تحریک انصاف کے دور میں پیدا نہیں ہوا،یہ دہائیوں سے چلا آرہا ہے، یہ بتائیں اس پر آپ نے کیا کیا؟

واضح رہے کہ گزشتہ روز وزیر اعظم کی خصوصی ہدایت پر وزارتِ خارجہ میں قائم “کشمیر سیل” کا پہلا اجلاس مخدوم شاہ محمود قریشی کی زیر صدارت ہوا ۔

اس اجلاس میں وفاقی وزیر قانون فروغ نسیم ،سول و عسکری حکام ،سیکریٹری خارجہ سمیت وزارتِ خارجہ کے سینیئر حکام شریک ہوئے۔

اس موقع پر وزیر خارجہ نے کہا کہ مقبوضہ جموں و کشمیر کے حوالے سے ہندوستان کا بیانیہ مسلسل تبدیل ہوتا آ رہا ہے جبکہ پاکستان کا نقطئہ نظر یکساں، واضح، اور دوٹوک ہے۔

ان کا مزید کہنا تھا کہ پاکستان مقبوضہ جموں و کشمیر کے نہتے مسلمانوں کو بھارتی بربریت سے نجات دلانے اور ان کی حق خودارادیت کے حصول کی جدوجہد میں ان کی سیاسی، سفارتی اور اخلاقی معاونت جاری رکھے گا۔