وزیراعظم کی معاون خصوصی برائے اطلاعات فردوس عاشق اعوان نےکہا ہے کہ حکومت زلزلہ متاثرین کومکمل امداد فراہم کرے گی۔

آزاد کشمیر کے ضلع میرپور میں میڈیاسے بات چیت کرتے ہوئےمعاون خصوصی کا کہناتھا کہ زلزلے میں اب تک 24 افرادجاں بحق ہوچکے ہیں جبکہ ڈویژنل اسپتال میرپور میں اب تک 500زخمی لائے گئے۔

انہوں نے کہا کہ حکومت کی جانب سے ڈویژنل اسپتال میرپورمیں پورٹ ایبل ایکسرے مشین جلد فراہم کردی جائے گی۔ حکومت اور آزاد کشمیرکی حکومت کازلزلہ متاثرن کی بحالی سے متعلق کام  قابل تحسین ہے۔

معاون خصوصی کا مزید کہناتھا کہ زلزلے میں جاں بحق ہونے والے افراد کے لواحقین کیلئے معاوضے کی ادائیگی کیلئےلائحہ عمل بنادیاگیا ہے جس پر جلدعملدرآمد کیا جائے گا۔

پاکستانی قوم کوخراج تحسین پیش کرتے ہوئے معاون خصوصی نے کہاکہ جب بھی اس قوم پر مشکل وقت آیا سب متحد ہوئے، مشکلات کا مقابلہ قوم متحد ہوکرکرتی ہے۔

حزب اختلاف کی جانب سے پوائنٹ اسکورنگ پرصحافیوں سے بات کرتے ہوئے ڈاکٹر فردوس عاشق اعوان کا کہناتھا کہ ہم سب کو سیاست سے بالاتر ہوکر زلزلہ متاثرین کی مدد کرنی چاہیئے۔

میڈیا ٹاک کے دوران گزشتہ روز کےاپنے بیان سے متعلق قیاس آرائیوں پر روشنی ڈالتے ہوئے معاون خصوصی نے کہا کہ میرے کل کے بیان کو زلزلےکے ساتھ جوڑاگیاجسکی مذمت کرتی ہوں۔

انہوں نے کہا کہ ایک مخصوص میڈیا گروپ نے میرے بیان کوتوڑ مروڑ پیش کیا، کل کی تقریر میں سوشل میڈیا کی تبدیلی کی بات کی تھی۔ تقریر کے وقت زلزلے کے بعد تباہی کاعلم نہیں تھالیکن کچھ لوگوں نےمیرے بیان کوزلزلے سے جوڑ دیا جو افسوناک ہے۔