وزیر اعظم عمران خان نے کشمیر میں جاری بھارتی جارحیت کے متعلق نریندر مودی کو مخاطب کرتے ہوئے کہا ہے کہ جس میں انسانیت ہوتی ہے وہ کبھی عورتوں اور بچوں پر ظلم نہیں کر سکتا لیکن مودی کبھی اپنے ارادے میں کامیاب نہیں ہوسکتا ہے۔

مظفرآباد میں جلسے خطاب کرتے ہوئے وزیر اعظم عمران خان نے  کہا ہے کہ مقبوضہ کشمیر میں گزشتہ 40 روز سے کشمیری کرفیو میں پھنسے ہوئے ہیں۔

عمران خان کا کہنا تھا کہ میں نے جب دنیا میں کشمیر کا سفیر بننے کا فیصلہ اس لیے کیا کہ میں ایک پاکستانی، ایک مسلمان اور ایک انسان ہوں اور کشمیر کا مسئلہ انسانیت کا مسئلہ ہے۔

وزیراعظم نے کہا کہ ساری دنیا میں کشمیر کا سفیر بن کر جاؤں گا اور دنیا کو کشمیر کا مسئلہ بتاؤں گا۔

انہوں نے کہا خاص طور پر نریندر مودی کو پیغام دینا چاہتا ہوں کہ ایک بزدل انسان صرف ایسا ظلم کرتا ہے جو آج کشمیریوں پر بھارتی فوج کر رہی ہے۔

وزیر اعظم عمران خان نے مسئلہ کشمیر کے متعلق آگاہ کرتے ہوئے کہا کہ دنیا کے 58 ممالک نے پاکستانی مؤقف کی تائید کی کہ کشمیر پر لوگوں پر ظلم ہو رہا ہے جبکہ 50 سال میں پہلی بار کشمیر کا مسئلہ سلامتی کونسل میں اٹھا ہے اور او آئی سی نے بھی بھارت سے مقبوضہ کشمیر میں کرفیو اٹھانے کا مطالبہ کیا ہے۔

انہوں نے مزید کہا کہ امریکی سینیٹرز کی جانب سے صدر ٹرمپ کو خط بھی لکھا گیا ہے کہ آپ کشمیر کے معاملے میں مداخلت کریں جبکہ برطانوی پارلیمنٹ میں بھی پہلی بار کشمیر کے موضوع پر بات کی گئی ہے۔