کراچی الیکٹرک (کے الیکڑک) نے اپنے اعلامیے میں خبردار کیا ہے کہ نیشنل ٹرانسمیشن اینڈ ڈسپیچ کمپنی (این ٹی ڈی سی) کی جانب سے بجلی کی ترسیل میں کمی کے باعث اہلیان کراچی کو لوڈشیڈنگ کا سامنا ہوسکتا ہے۔
اعلامیے کے مطابق این ٹی ڈی سی نے 29 ستمبر سے بجلی کی فراہمی میں کمی کردی ہے۔کے الیکٹرک کو نیشنل گریڈ سے 250 میگاواٹ بجلی کے شارٹ فال کا سامنا ہے۔
حب کو-این کے آئی کے نیشنل گرڈ سے 500 کلو واٹ بجلی کا شارٹ فال 29 ستمبر سے شروع ہوا۔
علاوہ ازیں بتایا گیا کہ ہوا کے دباؤ میں کمی کے باعث ونڈ ٹربائن سے 150 میگا واٹ بجلی کم پیدا ہورہی ہے جس کے باعث نیشنل گرڈ سے کے الیکٹرک کو مجموعی طور پر 250 میگا واٹ تک شارٹ فال کا سامنا ہے۔
اعلامیہ کے مطابق کے الیکٹرک نے دعویٰ کیا کہ بارش کے بعد بڑھتے ہوئے درجہ حرات کے پیش نظر ترسیلی کمپنی تمام ممکنہ وسائل بروئے کار لارہی ہے تاکہ شارٹ فال کو کم سے کم کیا جا سکے۔

کے الیکٹرک نےدعویٰ کیا کہ این ٹی ڈی سی کے حکام سے مسلسل رابطہ ہے تاہم بجلی کی ترسیل میں کمی کو دور کیا جائے اور مسئلے کا ممکنہ حل تلاش کیا جا سکے۔
اعلامیہ میں خبردار کیا گیا کہ این ٹی ڈی سی کی جانب سے بجلی کی ترسیل میں کمی کے نتیجے میں جزوقتی اور طویل دوراینے پر مشتمل لوڈشیڈنگ ہوگی جس میں وہ تمام علاقے بھی شامل ہوں گے جہاں بجلی کی لوڈشینڈنگ نہیں ہوتی تھی۔
کے الیکٹرک نے اعلامیے میں صارفین سے تحمل کا مظاہرہ کرنے کی درخواست کی ہے۔ جیسے ہی این ٹی ڈی سی میں مرمت کا کام مکمل ہوجائے گا شہر میں بجلی کی ترسیل معمول کے مطابق ہوجائے گی۔