چیئرمین پاکستان پیپلز پارٹی بلاول بھٹو زرداری نے پی ایس 11 لاڑکانہ میں ضمنی انتخابات کے نتائج کو چیلنج کرنے کا اعلان کر دیا ہے۔

We will challenge this rigging at every forum. The truth can’t be hidden. We will expose this selection. We will have a re-election and take back this seat. 5/5 #PS11

— BilawalBhuttoZardari (@BBhuttoZardari) October 17, 2019

سماجی رابطے کی ویب سائٹ ٹوئٹر سے جاری اپنے پیغام میں بلاول بھٹو نے کہا ہے کہ سچ کو چھپایا نہیں جاسکتا، ہم اس سلیکشن کو بے نقاب کریں گےاور دوبارہ انتخابات کروا کر اس سیٹ کو جیتیں گے۔

بلاول بھٹو کا کہنا ہے کہ مجھے اپنے جیالوں پر فخر ہے کہ دباؤ کے باوجود انہوں نے انتخابات کے لئے جدوجہد کی،انہوں نے الزام عائد کیا کہ قومی احتساب بیورو نے پی پی پی ورکرز اور ان کے خاندانوں کو نوٹسز بھیج کر قبل از انتخابات دھاندلی کی ہے۔

بلاول بھٹو نے کہا کہ خواتین کے پولنگ اسٹیشنز پر جہاں پی پی کی خاصی حمایت تھی، تاخیر سے پولنگ شروع کرائی گئی۔

چیئرمین پاکستان پیپلز پارٹی کا کہنا ہے کہ میڈیا مسلسل رپورٹ کرتا رہا کہ خواتین ووٹرز کو دھمکایا جارہا ہے کہ وہ جی ڈی اے کو ووٹ دیں، ہماری بار بار کی شکایتوں کے باوجود الیکشن کمیشن نے کوئی نوٹس نہیں لیا۔

واضح رہے کہ گزشتہ دن گرینڈ ڈیموکریٹک الائنس کے انتخابی امیدوار معظم عباسی نے ایک مرتبہ پھرغیر حتمی اور غیر سرکاری نتائج کے مطابق پاکستان پیپلزپارٹی کے امیدوار کو شکست سے دوچار کرکے لاڑکانہ کے حلقے پی ایس -11 کی نشست پرکامیابی حاصل کی تھی۔
138 پولنگ اسٹیشنوں کے غیر سرکاری و غیر حتمی نتائج کے مطابق جی ڈی اے کے معظم عباسی نے 31557 ووٹ لے کر کامیابی حاصل کی ہے جب کہ پیپلز پارٹی کے امیدوار جمیل سومرو 26021 ووٹ لے کر دوسرے نمبر پر رہے ۔