وزیر اعظم کی معاون خصوصی برائے اطلاعات و نشریات فردوس عاشق اعوان کا کہنا ہے کہ قوم وزیر اعظم کی قیادت میں چٹان بن کر کھڑی ہے۔

تفصیلات کے مطابق فردوس عاشق اعوان نے تقریب سے خطاب کر تے کہا ہے کہ سافٹ پاور میڈیا کلیدی حیثیت اختیار کر چکا ہے، سوشل میڈیا سے پیغام چند لمحوں میں دنیا تک پہنچایا جا سکتا ہے۔

معاون خصوصی کا کہنا ہے کہ وزیر اعظم کے خطاب نے انٹرنیشنل کمیونٹی کو جھنجھوڑا، وزیر اعظم نے مسئلہ کشمیر پر مؤثر انداز سے دنیا کو آگاہی دی ،حکومت آزادی اظہار رائے پر یقین رکھتی ہے، وزیر اعظم نے اسلام کا حقیقی چہرہ دنیا کے سامنے رکھا ہے،میڈیا حکومت کی رہنمائی میں اہم کردار ادا کر سکتا ہے، عالمی طاقتیں ہمیشہ اپنے مفادات کو مد نظر رکھتی ہیں،حکومت پر تنقید کرنا اور صحیح راستہ دکھانا میڈیا کا اچھا اقدام ہے، میڈیا کا حق ہے کہ وہ حکومت کی اصلاح کرے۔

فردوس عاشق نے کہا کہ میڈیا کو خیال رکھنا ہے کہیں ملکی مفاد کے خلاف تو کچھ نہیں ہو رہا، پاکستانی قوم نے دہشت گردی کے خلاف جنگ لڑی، قوم وزیر اعظم کی قیادت میں چٹان بن کر کھڑی ہے۔

معاون خصوصی برائے اطلاعات و نشریات نے مزید کہا کہ دنیا کی نظریں پاکستانی عوام کی طرف ہیں، اس ملک میں ادارے لوگوں کے تابع نہیں ہوں گے، لوگ اب ادارے کے تابع ہوں گے، پاکستان میں رہنے والا بچہ بچہ کشمیریوں کی آواز ہے، کشمیر بنے گا پاکستان کی تکمیل تک دنیا کو پیغام دیتے رہیں گے۔