وزیراعظم عمران خان نے لائن آف کنٹرول پر بھارتی سیکیورٹی فورسز کی جانب سے آزاد جموں و کشمیر میں شہری آبادی پر بلا اشتعال فائرنگ کی شدید الفاظ میں مذمت کی ہے۔

تفصیلات کے مطابق وزیراعظم نے بھارتی فائرنگ کے نتیجے میں شہید ہونے والے معصوم شہریوں اور پاک فوج کے جوان کے درجات کی بلندی، اور زخمیوں کی جلد صحت یابی کیلئے دعا کی۔

عمران خان نے پاک فوج کو بھارتی سیکیورٹی فورسز کو منہ توڑ جواب دینے اور جرات و بہادری پر سلام پیش کیا۔

واضح رہے کہ بھارتی فوج کی لائن آف کنٹرول (ایل او سی) پر بلااشتعال فائرنگ کے نتیجے میں پاک فوج کا جوان اور تین شہری شہید ہوگئے۔

اس موقع پر آئی ایس پی آر کا کہنا تھا کہ پاک فوج نے بلا اشتعال بھارتی فائرنگ کا مؤثر جواب دیا جس کے نتیجے میں 9 بھارتی فوجی ہلاک اور کئی زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے ایل او سی پر جورا،شاہ کوٹ اور نوسہری سیکٹرز میں سیزفائر کی خلاف ورزیاں کیں  اور جان بوجھ کر شہری آبادی کو نشانہ بنایا۔

ڈی جی آئی ایس پی آر نے کہا تھا کہ بھارت مبینہ کیمپوں کونشانہ بنانےکی آڑمیں معصوم شہریوں کونشانہ بنا رہاہے۔ زخمی شہریوں کوڈسٹرکٹ اسپتالوں میں منتقل کردیاگیاہے۔ بھارتی فوج نےجان بوجھ کر شہری آبادی کو نشانہ بنایا ہے۔ یو این مبصرمشن،ملکی،غیر ملکی میڈیاکو آزاد جموں کشمیر میں آزادانہ رسائی ہے۔

ڈی جی آئی ایس پی آر یہ بھی کہا تھا کہ بھارت کو سیز فائرخلاف ورزیوں کاہمیشہ منہ توڑ جواب ملےگا۔ پاک فوج ایل اوسی پرمعصوم شہریوں کی حفاظت جاری رکھےگی۔ پاک فوج ایل اوسی کی خلاف ورزی پربھارتی فوج کوناقابل برداشت نقصان پہنچائےگی۔ سچ بتا کرجھوٹےبھارتی دعوؤں،جعلی فلیگ آپریشن کی تیاریوں کوبےنقاب کرتےرہیں گے۔