وزیر اعظم پاکستان عمران خان سعودی عرب کے ایک روزہ دورہ پر ریاض  پہنچ گئے۔

  اس موقع پرشاہ خالد ائیر پورٹ کے رائل ٹرمینل پر گورنر ریاض فيصل بن بندر بن عبد العزيز ال سعود اور وزیر مملکت اور نیشنل سیکیورٹی ایڈوائزر ڈاکٹر مساعد بن محمد العیبان نے استقبال کیا جبکہ سعودی عرب میں پاکستان کے سفیرراجہ علی اعجاز، سعودی حکام اور سفارت خانے کےدیگر افسران بھی استقبال کیلئے موجود تھے۔

ایئرپورٹ پر استقبال کے بعد وزیراعظم عمران خان کی سعودی فرمانروا خادم الحرمین شریفین شاہ سلمان بن عبدالعزیز آل سعود سے ملاقات ہوئی۔

ملاقات میں دونوں رہنماؤں نے دوطرفہ تعلقات، خطے میں امن و امان اور عالمی سیاسی صورتحال پر تبادلہ خیال کیا گیا جبکہ دونوں رہنماؤں نے دوطرفہ تعاون کو مزید بڑھانے پر بات چیت کی۔

ملاقات میں وزیراعظم عمران خان کا علاقائی امن و استحکام کی خاطر خطے میں اختلافات اور تنازعات کے سیاسی اور سفارت کاری کے ذریعے حل پر زور دیا گیا اور شاہ سلمان بن عبدالعزیز کو مقبوضہ کشمیر کی تازہ ترین صورتحال سے آگاہ بھی کیا۔

وزیراعظم کی جانب سے دورہ ایران سے متعلق سعودی فرمانروا کو اعتماد میں لیا گیا۔

سعودی عرب کے ایک روزہ دورہ میں وزیر خارجہ شاہ محمود قریشی اور معاون خصوصی برائےسمندر پار پاکستانی سید ذوالفقار بخاری  بھی وزیر اعظم کے ہمراہ موجود ہیں۔

یاد رہے کہ وزیر اعظم عمران خان  ریاض دورے کے موقع پر سعودی فرما نرواں شاہ سلمان اور ولی عہد محمد بن سلمان سے ملاقات کے علاوہ خطے میں بڑھتی کشیدگی پر تبادلہ خیال کیا جائے گا۔

واضح رہے اس سے قبل وزیر اعظم عمران خان  ایک روزہ دورے پر تہران پہنچے تھے، ایرانی صدر حسن روحانی اور سپریم لیڈر علی خامنہ ای سے ملاقاتیں کیں ،مشترکہ اعلامیے کے مطابق وزیراعظم  عمران نے خلیجی ممالک کو ممکنہ فوجی تنازع سے بچانے پر زور دیتے ہو ئے کہا کہ خلیجی ممالک میں تمام فریقین بات چیت سے مسائل حل کریں۔

اعلامیے میں کہا گیا تھا کہ وزیر اعظم  عمران خان نے پاکستان اور ایران کے درمیان تاریخی اور ثقافتی تعلقات کی اہمیت کو اجاگر کیا اور مختلف شعبوں میں باہمی تعاون کے فروغ کا اعادہ کیا، وزیراعظم نے صدر روحانی کو 5اگست کے بھارتی اقدام  سے آگاہ کرتے ہو ئے کہا کہ  مقبوضہ کشمیر کی موجودہ صورتحال سے خطے کا امن  خطرے میں ہے۔