بھارت کے سابق وزیراعظم من موہن سنگھ نے کرتارپورراہداری کی افتتاحی تقریب میں شرکت کی دعوت قبول کر لی ہے۔

تفصیلات کے مطابق بھارتی پنجاب کے وزیراعلیٰ امریندر سنگھ کے ترجمان نے سماجی رابطے کی ویب سائٹ ٹوئٹر سے جاری اپنے پیغام میں کہا ہے کہ سابق وزیراعظم منموہن سنگھ نے امریند سنگھ کی جانب سے دی گئی دعوت پر کرتارپورگردوارا اور سلطان پور لودھی کی تقریب میں شرکت پر آمادگی کا

اظہار کیا ہے۔

من موہن سنگھ 9نومبر کو کرتارپورگوردوارہ کا دورہ کریں گے

واضح رہے کہ گزشتہ دن پاکستان کے وزیر خارجہ شاہ محمود قریشی کی طرف سے جاری بیان میں بھی کہا گیا تھا کہ سابق بھارتی وزیراعظم من موہن سنگھ کو تحریری طور پردعوت نامہ بھجوائیں گے۔

انہوں نے مزید کہا تھا کہ من موہن سنگھ کو دعوت دینے کا فیصلہ مشاورت کے بعد کیا گیا،وزیر خارجہ شاہ محمود قریشی نے کہا کہ کرتارپورراہداری کی افتتاحی تقریب ایک بڑا موقع ہےاور جس پر ہم بہت خوش ہیں، افتتاحی تقریب کےلیے پوری تیاری کررہے ہیں،وزیراعظم عمران خان بھی اس  تقریب کے حوالے سے کافی دلچسپی لے رہے ہیں۔

شا ہ محمود قریشی نے کہا کہ من موہن سنگھ سکھ برادری کی نمائندگی کرتے ہیں،ہم کرتارپورراہداری کی افتتاحی تقریب کےلیے سکھ برادری کے منتظر ہیں اورسکھ برادری سے اپیل کرتے ہیں کہ وہ باباگرونانک کے 550 ویں جنم دن کی خوشیوں میں شامل ہوں۔