لارڈ ڈنکن کی قیادت میں کونسل فارہیومن رائٹس اینڈ ریلیجیس فریڈم برطانیہ کے وفد کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی۔

دوران ملاقات مقبوضہ جموں و کشمیر کی موجودہ صورت حال سمیت باہمی دلچسپی کے امور پر تبادلہ خیال کیا گیا۔

وزیر خارجہ مخدوم  نے کہا کہ بھارت کی جانب سے مقبوضہ جموں و کشمیر میں انسانی حقوق کی سنگین خلاف ورزیاں بدستور جاری ہیں، گذشتہ ایک سو چھ روز سے مقبوضہ جموں و کشمیر کے 80 لاکھ نہتے کشمیریوں کو محصور کیے ہوئے ہے۔

مخدوم شاہ محمود قریشی نے یہ بھی کہا کہ مقبوضہ جموں و کشمیر میں مسلسل کرفیو کے باعث ایک انسانی المیہ جنم لے رہا ہے خوراک اور طبی سہولیات میسر نہیں ہو رہیں جبکہ ذرائع مواصلات پر مکمل پابندی عائد ہے بین الاقوامی میڈیا کے نمائندوں کو مقبوضہ کشمیر میں رسائی نہیں دی جارہی تاکہ حقائق دنیا کی نظروں سے پوشیدہ رہیں۔

شاہ محمود قریشی کا کہنا تھا کہ مقبوضہ جموں و کشمیر کی تشویش ناک صورتحال، اس بات کی متقاضی ہے کہ انسانی حقوق کی عالمی تنظیمیں اور عالمی برادری، نہتے مظلوم کشمیریوں کو بھارتی استبداد سے نجات دلانے کے لیے اپنا موثر کردار ادا کریں۔

وزیرخارجہ شاہ محمود قریشی کا مزید کہنا تھا کہ بھارت نے کشمیر اور کارگل لداخ کو یونین ٹیرٹیریز کاحصہ بنا کر اور مقبوضہ کشمیر کی خصوصی آئینی حیثیت کو یکطرفہ طور پر تبدیل کر کے، عالمی قوانین کی خلاف ورزی کی ہے۔

شاہ محمود قریشی سے ملاقات میں لارڈ ڈنکن نے مقبوضہ کشمیر کی صورتحال پر تشویش کا اظہار کرتے ہوئے کہا کہ مقبوضہ کشمیر میں جاری انسانی حقوق کی خلاف ورزیوں کے خلاف آواز بلند کرنے کا عندیہ دیا۔

اس موقع پر انٹرنیشنل پیس ایکٹوسٹ راجہ شیراز اختر، ایمنیسٹی انٹرنیشنل کے رکن بیرسٹر راشد احمد بھی وفد میں شامل تھے۔