اسلام آباد میں میجر لاریب کے قتل میں ملوث دو افراد کو گرفتار کر لیا گیاہے، قتل میں ملوث گرفتار ملزمان افغان شہری ہیں۔

تفصیلات کے مطابق پولیس نے سیکٹر جی نائن تھری میں پچھلے مہینے قتل ہونے والے ایس ایس جی کمانڈو میجر لاریب حسن ِگل کے قتل میں ملوت ملزمان گرفتار کر لیے ہیں۔

پولیس ذرائع کے مطابق میجر لاریب حسن کے قتل میں ملوث گرفتار ملزمان افغان شہری ہیں۔

پریس کانفرنس کرتے ہوئے اسلام آباد پولیس انسپکٹر جنرل (آئی جی) عامر ذوالفقار خان نے کہا کہ 22 تاریخ کو میجر لاریب کے قتل کا واقع پیش آیا۔

آئی جی اسلام آباد عامر ذوالفقار کے مطابق معاملے کی تفتیش میں 25 افسران لگے رہے، دونوں قاتلوں کو گرفتار کرلیا ہے۔

میجر لاریب کو گولی مارنے والے دونوں افغان شہری ہیں، ایک ملزم کا نام بیت اللّٰہ اور دوسرے کا نام گل سلیم ہے۔

دونوں ملزم ڈکیتیوں اور راہزنی کی وارداتوں میں ملوث ہیں۔

ذرائع کے مطابق کے ملزمان نے پولیس کو بیان ریکارڈ کراتے ہوئے کہا ہے کہ کراچی کمپنی میں واقع پارک کے قریب ان کی موٹر سائیکل کا ٹائر پنکچر ہوا تو انہوں نے ڈکیتی کا ارادہ کر لیا۔

ملزمان کے مطابق میجر لاریب اور ایک خاتون پارک میں واک کر رہے تھے، میجر لاریب کے سر پر بندوق رکھ کر پیسے اور موبائل چھیننے کی کوشش کی جس پر انہوں نے مزاحمت کی، مزاحمت پر ہم نے گولی چلا کر میجر کو قتل کر دیا۔

پولیس ذرائع کے مطابق ملزمان نے اس سے قبل جی 10 میں ایک نوجوان سے نقدی اور موبائل چھیننے کا بھی اعتراف کر لیا ہے۔

نامعلوم افراد کی فائرنگ ، ڈی ایس پی شہید

واضح رہے کہ 21 نومبر کی رات کراچی کمپنی پولیس اسٹیشن کی حدود میں واقع جی نائن ون میں پولیس اپارٹمنٹ کے قریب حساس ادارے کے آفیسر لاریب کو گولیاں مار کر قتل کیا گیا تھا۔

موٹرسائیکل سوار شوٹرز نے حساس ادارے کے افسر کو اس وقت گولیوں کا نشانہ بنایا جب وہ نجی فضائی کمپنی کی ملازمہ کے ساتھ ایک پارک میں بیٹھا ہوا تھا، آفیسر کو سر میں گولیاں لگیں جس کی وجہ سے وہ موقع پر ہی جاں بحق ہوگیا تھا۔