وزیر اعظم عمران خان نے خصوصی عدالت کے  جج جسٹس وقار سیٹھ  کے خلاف ریفرنس دائر کرنے کی ہدای کردی ہے۔

تفصیلات کے مطابق سابق صدر جنرل (ر) پرویز مشرف کے خلاف سنگین غداری کیس  کے فیصلے پر مشاورت کے لیے  وزیراعظم عمران خان کی زیرصدارت خصوصی اجلاس ہوا۔

حکومت نے قانونی ماہرین کی رائے پر سابق صدر جنرل (ر) پرویز مشرف کے خلاف سنگین غداری کیس کا فیصلہ سنانے والی خصوصی عدالت کے جج جسٹس وقار سیٹھ کے خلاف سپریم جوڈیشل کونسل میں ریفرنس دائر کرنے کا فیصلہ کیا ہے۔

اجلاس میں حکومت کی قانونی ٹیم نےوزیر اعظم  کو بریفنگ میں بتایا کہ فیصلہ انتقامی کاروائی پر مبنی لگ رہا ہے، فیصلے میں انصاف کے تقاضے پورے نہیں کیے گئے ،ملکی تاریخ میں ایسی مثال نہیں ملتی۔

قانونی ٹیم نے مزید کہا کہ فیصلہ غیر آئینی  و غیر شرعی ہے جبکہ ڈی چوک پر لٹکانے والی بات انسانی حقوق سے متصادم ہے۔

اس موقع پر وزیر اعظم عمران خان  نے جسٹس وقار سیٹھ کے خلاف ریفرنس دائر کرنے کی ہدایت کرتے  ہوئے کہا کہ اداروں کے درمیان تصادم کی صورتحال پیدا ہونے نہیں دیں گے۔

انہوں نے مزید کہا کہ کسی طور بھی ملک کو غیر مستحکم نہیں ہونے دیں گے۔

واضح رہے کہ خصوصی عدالت کے تین رکنی بینچ کے سربراہ جسٹس وقار سیٹھ نے فیصلے کے پیرا گراف نمبر 66 میں لکھا ہے کہ اگر پرویز مشرف انتقال کر جاتے ہیں تو ان کی لاش کو تین روز تک اسلام آباد کے ڈی چوک پرلٹکایا جائے۔

دوسری جانب اٹارنی جنرل انور منصور خان نے کہا کہ یہ فیصلہ دشمنی کی بنیاد پر دیا گیا ہے، فیصلے کوکالعدم قراردینے کے لیے درخواست دینی پڑے گی۔

اٹارنی جنرل نے کہا کہ فیصلے سےادارے کوبھی چوٹ پہنچائی گئی ہے۔

یاد رہے کہ گذشتہ روز ڈی جی آئی ایس پی آر میجر جنرل آصف غفور نے بھی اپنے بیان میں کہا تھا کہ جنرل مشرف کسی صورت غدار نہیں ہوسکتے،فیصلے پر افواج پاکستان میں شدید غم و غصہ پایا جاتا ہے۔