کراچی میں شیڈول کے باوجود آج سی این جی اسٹیشن نہیں کھل سکے ہیں۔

تفصیلات کے مطابق گیس اسٹیشن کے مالکان کا کہنا ہے کہ سی این جی اسٹیشن نہیں کھلیں گے، گیس پریشر نہیں اس لیے سی این جی اسٹیشن بند رہیں گے۔

ذرائع کے مطابق دوسری جانب سوئی سدرن گیس کمپنی کے ترجمان کا کہنا ہے کہ ہماری پہلی ترجیح گھریلو صارفین کو گیس کی فراہمی ہے،سی این جی اسٹیشن آج 24 گھنٹے کے لیے بند کیے گئے ہیں جبکہ کل شیڈول کے مطابق سی این جی بند رہے گی۔

دوسری جانب پنجاب میں انڈسٹریز کو گیس کی فراہمی 10 روز بعد بحال ہوگئی، گیس کی فراہمی کے بعد صنعتی پہیہ بھی چل پڑا۔

سی این جی اسٹیشنز کھل گئے

ذرائع کے مطابق سوئی ناردن گیس کے نوٹی فکیشن کے بعد آج صبح سے پنجاب کی صنعتوں کو گیس کی سپلائی بحال کر دی گئی ہے، 10 روز تک معطل رہنے والی گیس کی سپلائی بھی شروع ہوئی توصنعتی پہیہ بھی چل پڑا۔

فیصل آباد، گوجرانوالہ، سیالکوٹ میں انڈسٹریز کو دس روز سے گیس کی فراہمی معطل تھی اور صنعت کار مہنگے متبادل ذرائع سے پیدواری عمل جاری رکھے ہوئے تھے۔

نوٹیفکیشن کے مطابق سی این جی سیکٹرز کواب بھی گیس کی بندش کا سامنا رہے گا۔

دوسری طرف فیصل آباد،گوجرانوالہ ،ملتان، بہاولپور، جھنگ، سرگودھا سمیت پنجاب کے کئی اضلاع میں گھریلو صارفین گیس کی عدم فراہمی پر سخت پریشان ہیں۔

اطلاعات کے مطابق ان شہروں میں گھروں میں صبح ہوتے ہی گیس کی بندش سے معمولاتِ زندگی متاثر رہتے ہیں۔

ادھردوسری جانب سندھ کے کئی شہروں میں بھی گیس بحران سے گھریلو صارفین کو سخت مشکلات کاسامناکر ناپڑ رہا ہے۔

واضح رہے کہ شہر کراچی میں ہفتے بھر سے جاری سی این جی بندش جاری ہے جو کہ خاتمے کا نام نہیں لے رہی ہے۔

صارفین کہتے ہیں کہ گیس بندش سے معمولات زندگی تباہ ہوگئی ہے،  آنے جانے کا ارادہ کریں تو سی این جی کا خیال بڑھتے قدم روک دیتا ہے۔