وزیراعظم عمران خان نے کہا ہے کہ بھارت میں‌ مسلمانوں‌ کی نسل کشی کی تیاری ہورہی ہے ، عالمی برادری کو جاگنا ہوگا۔

تفصیلات کے مطابق سماجی رابطے کی ویب سائٹ پر اپنے ایک ٹویٹ میں وزیر اعظم کا کہنا تھا کہ بھارت میں مسلمانوں کی نسل کشی کی تیاری ہورہی ہے، کسی بڑے سانحے سے پہلے عالمی برادری کو جاگنا ہوگا اور اگر عالمی برادری نے سستی کا مظاہرہ کیا تو پھرحالات کی ذمہ داربھی وہی ہوگی۔

بین الاقوامی برادری بیدار ہو جائے قبل اسکے کہ بے لگام RSS مسلمانوں کےخون سےایسی ہولی کھیلےکہ تاریخ انسانی میں قتل عام کے دیگر واقعات ہیچ دکھائی دینے لگیں۔ ہٹلر کی خاکی وردی ہو یا RSS، جب بھی مسلح جتھوں کا خمیر کسی قوم کیخلاف بےجا نفرت سے اٹھایا گیا،حالات قتل عام ہی پر منتج ہوئے۔ https://www.bolnews.com/urdu/pakistan/2019/12/814727/amp/

— Imran Khan (@ImranKhanPTI) December 26, 2019

اپنے پیغام میں وزیراعظم نے کہا کہ بین الاقوامی برادری بیدار ہو جائے قبل اس کے کہ بے لگام آر ایس ایس مسلمانوں کےخون سےایسی ہولی کھیلےکہ تاریخ انسانی میں قتل عام کے دیگر واقعات ہیچ دکھائی دینے لگیں۔

ایک بارپھرعمران خان نے بھارت میں ہٹلرسوچ کی مذمت کرتے ہوئے کہا کہ’ہٹلر کی خاکی وردی ہو یا آر ایس ایس، جب بھی مسلح جتھوں کا خمیر کسی قوم کے خلاف بےجا نفرت سے اٹھایا گیا، اُس کا اختتام قتل عام پر ہی ہوا۔

یاد رہے کہ اس سے قبل  بھارت سے تعلق رکھنے والے سماجی رہنما اور وکیل بیرسٹر سوچیترا ویجاین نے سماجی رابطے کی ویب سائٹ پر آر ایس ایس کے مارچ کی ویڈیو شیئر کی تھی۔

وزیراعظم سے سعودی وزیرخارجہ کی ملاقات

بیرسٹرسوچیتراویجاین نے اپنے ٹوئٹ میں  لکھا  تھا کہ‘ آر ایس ایس کا مارچ تلنگا سے گزر رہا ہے، یہ متحرک ہورہے ہیں، آر ایس ایس نظریاتی طور پر شیو سینا کی بچہ جماعت ہے، یہ سب نازی کے خاکی یونیفارم میں ہیں۔

بیرسٹرسوچیتراویجاین نے  مزید کہا کہ اگر  یہ سب دیکھ کر بھی بین الاقوامی کمیونٹی خاموش رہی تو اس کا مطلب ہے کہ وہ تشدد کرنے والوں کی پشت پناہی کررہے ہیں۔

واضح رہے اس سے قبل وزیراعظم نے پنڈدادنخان میں جلال پور کینال منصوبے کا سنگ بنیاد رکھنے کی تقریب سے خطاب کرتے ہوئے کہا تھا  کہ بھارت کے لوگ اب نریندر مودی کے خلاف احتجاج کر رہے ہیں اور  اب ہندو، مسلم، سکھ اور مسیحی سب مودی کے خلاف کھڑے ہوں گے،مودی کے ظلم کو بھارتی خود ہی ختم کریں گےاس کے لئے پاکستان کی ضرورت نہیں پڑے گی۔

عمران خان نے یہ بھی کہا تھا  کہ مودی حکومت کشمیر کے مسئلے اور بھارتی انتشار سے توجہ ہٹانے کے لیے لائن آف کنٹرول کی خلاف ورزی کر رہا ہےاور  آرمی چیف جنرل قمر باجوہ باجوہ ان حالات سے نمٹنے کے لیے تیار ہیں۔