سابق صدر جنرل (ر) پرویز مشرف شدید علالت کا شکارہوگئے ہیں جس کے باعث انہیں دبئی کے اسپتال میں داخل کروادیاگیا ہے۔

تفصیلات کے مطابق سابق صدر اورریٹائرڈ جنرل پرویز مشرف کے بارے میں ذرائع نے اطلاع ہے کہ انھیں شدید علالت کی حالت میں دبئی کے ایک نجی اسپتال منتقل کر دیا گیا ہے۔

خیال  رہےکہ دو ماہ قبل پرویزمشرف کی ایک میڈیکل رپورٹ میں انکشاف کیا گیاتھا کہ پرویز مشرف کو ایک جان لیوا بیماری لاحق ہے۔

ذرائع سے موصول ہونے والے تصدیق شدہ سرٹیفکیٹ کے مطابق سابق صدر کو ’امیلوئی ڈوسس‘ نامی خطرناک بیماری لاحق ہوئی تھی۔رپورٹ میں کہا گیا تھا کہ پرویزمشرف کاروزانہ کی بنیاد پرعلاج نہ ہونے سے جان کا خطرہ ہوتا ہے۔

خیال رہےکہ پرویز مشرف دل اور بلڈپریشر کے عارضے میں بھی مبتلا ہیں، ان کا علاج برطانیہ کے 2 اسپتالوں کے ساتھ مل کر کیاجارہا ہےجبکہ علاج اور تھراپی کاعمل روزانہ کی بنیاد پرایک سال جاری رہےگا۔

بعد ازاں میڈیکل سرٹیفکیٹ کی تصدیق دبئی میں پاکستانی قونصلیٹ سے کرائی گئی تھی، رپورٹ کے مطابق پرویزمشرف کو لا حق بیماری ایک جان لیوا بیماری ہے۔ ’امیلوئی ڈوسس‘ ایک کم یاب اور خطر ناک مرض ہے جو جسم کے اعضا اور ٹشوز میں امیلوئیڈ نامی ناقص پروٹین کی پیداوارسے لاحق ہوتا ہے، جس کی وجہ سے اعضا اور ٹشوز درست طور پر کام نہیں کر پاتے۔