اسلام آباد میں العزیزیہ اسٹیل ملزکیس کی پیروی کرنے والے نیب روالپنڈی کے پراسیکیوٹر کی گاڑی پرفائرنگ کی گئی ہے ۔

تفصیلات کے مطابق وفاقی دارالحکومت اسلام آباد کے علاقے نیوسوہان گارڈن میں نیب پراسیکیوٹر واثق ملک کی گاڑی پر نامعلوم موٹر سائیکل سواروں نے فائرنگ کردی تاہم وہ اس حملے میں محفوظ رہے۔

چیئرمین نیب نے فائرنگ کا نوٹس لیتے ہوئے واقعہ آئی جی اسلام آباد کے نوٹس میں لانے کی ہدایت کی اور ملزمان کی گرفتاری کا مطالبہ کیاہے۔

پولیس کی جانب سے واقعے کی تحقیقات شروع کردی گئی  ہیں اورجائے وقوعہ سے شواہد اکٹھے کرلیے گئے ہیں اور بیانات قلمبند کیے جارہے ہیں۔ مقامی پولیس نے واقعے سے متعلق شہریوں سے تفصیلات حاصل کی ہیں اور واثق ملک کا بیان بھی ریکارڈ کیاہے۔

خیال رہے کہ سابق وزیراعظم نوازشریف کی العزیزیہ اسٹیل ملزریفرنس میں سزا کے خلاف اپیل کی سماعت بھی آج ہے جب کہ العزیزیہ ریفرنس میں سزا بڑھانے اور فلیگ شپ انویسٹمنٹ ریفرنس میں نوازشریف کو بری کرنے کے عدالتی فیصلے کے خلاف اپیلوں پر سماعت بھی آج اسلام آباد ہائی کورٹ میں ہو گی۔

اسلام آباد ہائی کورٹ کا دو رکنی بینچ سماعت کرے گا ۔ بینچ میں جسٹس عامرفاروق اور جسٹس محسن اخترکیانی شامل ہیں۔

واضح رہے کہ العزیزیہ اسٹیل ملز ریفرنس میں احتساب عدالت نےنوازشریف کو7سال قید اورجرمانےکی سزاسنائی تھی جس کے خلاف نوازشریف نے اسلام آبادہائی کورٹ سے رجوع کر رکھا ہے۔

سابق وزیر اعظم نواز شریف اس وقت لندن میں زیر علاج ہیں، اسلام آباد ہائی کورٹ نواز شریف کو 8 ہفتوں کی طبی بنیادوں پر ضمانت دے چکی ہے جبکہ العزیزیہ ریفرنس میں ان کی جانب سے حاضری سے استثنی کی درخواست دائر کی گئی کہ وہ علاج کیلئے بیرون ملک ہونے کی وجہ سے عدالت میں پیش نہیں ہوں گے۔