وزیر خارجہ شاہ محمود قریشی تین روزہ دورے پر امریکا روانہ ہو گئے ہیں۔

وزیر خارجہ شاہ محمود قریشی امریکا کے تین روزہ سر کاری دورے پر روانہ ہو گئے ہیں جہا ں وہ اقوام متحدہ کے سیکریٹری جنرل انتونیو گوتریس اور جنرل اسمبلی کے صدرسے ملاقات کریں گے۔

وزیرخارجہ کا 15 تا17 جنوری 2020 واشنگٹن اور نیویارک کا دورہ

ترجمان دفترخارجہ کا کہنا ہے کہ وزیر خارجہ  15 تا 17 جنوری واشنگٹن اور نیویارک کے دورے پر ہوں گے۔

 شاہ محمود قریشی آج سیکریٹری جنرل سمیت یو این قیادت سے ملاقات کریں گے، جبکہ  17،16 جنوری کو واشنگٹن میں امریکی ہم منصب مائیک پومپیو سے ملاقات ہوگی۔

دفتر خارجہ کے مطابق وزیر خارجہ شاہ محمو د قریشی کے دورۂ امریکا کا مقصد مشرق وسطیٰ میں جاری کشیدگی میں کمی کی کوشش ہے۔

شاہ محمود قریشی امریکی حکام کے ساتھ ملاقاتوں میں مقبوضہ کشمیر کی صورت حال اور کشمیریوں پر بھارتی مظالم سے بھی آگاہ کریں گے۔

اس کے علا وہ وزیر خارجہ امریکی قومی سلامتی کے مشیر رابرٹ اوبرائن اور دیگر حکام سے بھی ملاقاتیں کریں گے۔

واضح رہے کہ گزشتہ دن وزیر خارجہ شا ہ محمو د قریشی دورۂ عمان مکمل کر کے واپس وطن پہنچے تھے۔

شا ہ محمو د قریشی نے اپنے دورہ کے دوران عمان کے سلطان ہیثھم بن طارق السید سے ملاقات کی اور ان کے ساتھ وزیر اعظم عمران خان اور پاکستانی قوم کی طرف سے سابق فرماں روا سلطان قابوس کے انتقال پر اظہار تعزیت بھی کیا۔