لاہور کیمپ جیل میں شارٹ سرکٹ کے باعث نیب کی بیرک میں آگ لگ گئی، مسلم لیگ ن کے مر کزی رہنما اور سا بق وفا قی وزیرخواجہ سعد رفیق سر پر چوٹ لگنے سے معمولی زخمی ہوئے۔

تفصیلات کے مطابق کیمپ جیل میں شارٹ سرکٹ کے باعث آگ سابق سیکرٹری فوادحسن فواد کی بیرک کے باہر لگی اس دوران سعد رفیق کمرے سے باہر نکلے اور زخمی ہو گئے، تاہم انہیں ابتدائی طبی امداد دے دی گئی۔

خواجہ سعد رفیق نے اپنی زبان بندی کا حل ڈھونڈ لیا

جیل حکام کا اس معاملے پر کہنا ہے کہ شارٹ سرکٹ کے باعث آگ لگنے کے بعد ریسکیو ٹیم کو نہیں بلایا گیا تاہم جیل کے عملے نے خود نیب کی بیرک میں لگی آگ پر قابو پا لیا۔

واضح رہے کہ احتساب عدالت لاہور میں پیراگون اسکینڈل کیس کی سماعت ہوئی تو نیب نے خواجہ سعد رفیق کو پیش کیا۔

سعد رفیق نے فاضل جج سے کہا کہ رات کو میری بیرک میں آگ لگی جس کی وجہ سے زخمی ہوگیا، میرا سر لوہے کے راڈ کے ساتھ لگا جس وجہ سے کچھ دیر تک مجھے کچھ نظر نہیں آیا۔

سعد رفیق نے فاضل جج سے کہا کہ جیل حکام روزانہ قومی اسمبلی کے اجلاس میں شرکت کے لیے مجھے اسلام آباد لیکر جاتے ہیں اور شام کو واپس لے آتے ہیں، میں ہر اجلاس کے موقع پر 8 گھنٹے کا سفر نہیں کرسکتا، اسلام آباد میں سب جیل قرار دیکر مجھے وہیں رکھا جائے۔

عدالت نے پیراگون ہاؤسنگ سوسائٹی اسکینڈل کیس میں گرفتار مسلم لیگ ن کے رہنما خواجہ سعد رفیق قومی اسمبلی سیشن میں شرکت کی اجازت دے دی ہے۔

اس موقع پر دلائل دینے ہوئے مسلم لیگ ن کے رہنما خواجہ سعد رفیق کے وکیل کا کہنا تھا کہ خواجہ سعد رفیق کی صحت ٹھیک نہیں ہے، جس پر احتساب عدالت نے سعد رفیق کو قومی اسمبلی سیشن میں شرکت کی اجازت دے دی۔

اپنے ریمارکس میں جج کا کہنا تھا کہ صحت کو مد نظر رکھتے ہوئے خواجہ سعد رفیق کی مرضی ہے جانا چاہیں یا نہ جانا چاہیں۔