سرفراز بگٹی کو بچی کے اغواء میں معاونت سے متعلق کیس میں گرفتار کرلیا گیا ہے۔

تفصیلات کے مطابق سابق وزیرداخلہ بلوچستان سرفرازبگٹی کو بچی کے اغوا کیس میں درخواست ضمانت منسوخ ہونے کے بعد گرفتار کر لیا گیا ہے۔

سینیٹر سرفراز بگٹی نے ڈسٹرکٹ اینڈ سیشن کی عدالت میں ایک بچی کی اغوا میں معاونت کرنے سے متعلق کیس میں ضمانت کے لیے درخواست دائرکی تھی جس کو آج خارج کر دیا گیا، جس کے بعد عدالتی حکم پر انھیں سیشن کورٹ سے گرفتار کر لیا گیا۔

سرفراز بگٹی پر کوئٹہ کے بجلی گھر تھانے میں اغوا کا مقدمہ گزشتہ ماہ درج کیا گیا تھا، مقدمہ خاتون کی مدعیت میں بچی کے اغوا میں سہولت کاری سے متعلق تھا۔

عدالت میں بلوچستان عوامی پارٹی کے سینیٹرکےخلاف درخواست دینے والی خاتون کا مؤقف تھاکہ ان کی بیٹی سحرش کے 2013 میں قتل کےبعد وہ اپنی دس سالہ پوتی ماریہ علی کی کفالت کررہی تھیں، تاہم 7 دسمبر 2019 کو جب وہ پوتی کو اس کے والد توکل علی بگٹی سے ملانے عدالت لائیں، تو انھوں نے میری پوتی کو اغوا کرکے سرفراز بگٹی کے گھر میں چھپا دیا۔

دوسری طرف سینیٹر سرفراز بگٹی کا کہنا ہے کہ توکل علی ان کا دوست ضرور ہے لیکن بچی کے اغوا کے مذکورہ واقعے سے ان کا کوئی تعلق نہیں ہے۔

ایڈیشنل اینڈ سیشن عدالت نے آج بچی کے اغواء میں معاونت سے متعلق کیس میں سابق وزیر داخلہ بلوچستان اور سینیٹر سرفراز بگٹی کو گرفتار کرنے کا حکم صادرکیاتھا۔