فنانشل ایکشن ٹاسک فورس (ایف اے ٹی ایف) نے پاکستان کو مزید کچھ وقت  کے لیے گرے لسٹ میں ہی برقرار رکھنے کا فیصلہ کیا ہے۔

وزارت خزانہ کی جانب سے جاری کردہ اعلامیے کے مطابق مذاکرات میں ایف اے ٹی ایف کی جانب سے پاکستان کے کیے گئے اقدامات کو سراہا گیا ہے تاہم  ایکشن پلان پر عملدرآمد  کے لیےپاکستان کو مزید وقت دیا گیا ہے۔

اعلامیے میں بتایا گیا کہ پاکستان جون 2020 تک فنانشل ایکشن ٹاسک فورس کی گرے لسٹ میں رہے گا اس دوران پاکستان کو فنانشل ایکشن ٹاسک فورس کی سفارشات پر مزید عملدرآمد کرنا ہوگا۔

وزارت خزانہ کے اعلامیے میں پاکستانی وفد نے فنانشل ایکشن ٹاسک فورس کو یقین دلایا ہے کہ باقی ماندہ نکات پر عملدرآمد میں تیزی لائی جائے گی۔

ایف اے ٹی ایف : عدالت کا ملا منصور کی جائیداد کو نیلام کرنے کا حکم

دوسری جانب  فنانشل ایکشن ٹاسک فورس نے  اجلاس کی 17 صفحات پر مشتمل رپورٹ جاری کردی ہے۔

ایف اے ٹی ایف کی جاری کردہ رپورٹ کے مطابق پیرس اجلاس میں  205 ممالک کے 800 مندوبین شریک ہوئے جس میں پاکستان کے اقدامات کا جائزہ لیا گیا۔

ایف اے ٹی ایف کی جانب سے پاکستان  کو آئندہ اجلاس تک تمام اہداف مکمل  کرنے کا وقت دیا گیا۔

رپورٹ میں کہا گیا کہ پاکستان کے لیے ایف اے ٹی ایف ایکشن پلان کی ڈیڈ لائن ختم ہونے تک اہداف مکمل نہ  ہوسکے ۔پاکستان نے  27 میں سے  14 اہداف میں پیش رفت کی۔

ایف اے ٹی ایف نے پاکستان سے مطالبہ کیا کہ باقی 13 اہداف پر بھی جو ن 2020 تک عمل درآمد یقینی بنائے۔کلعدم تنظیموں اور ان کے عہدیداران کو سزائیں دی جائیں اور ان کے عہدیداروں پر جرمانے عائد کیے جائیں۔

رپورٹ کے مطابق آئندہ اجلاس تک عمل نہ ہوا تو رکن ملکوں کو پاکستان کے ساتھ لین دین پر محتاط رہنے کی ہدایت جاری کی جائے گی۔

چینی وزارت خارجہ کے ترجمان گینگ شوانگ نے اس بات کی تصدیق کی کہ ایف اے ٹی ایف کے اجلاس میں اس بات کا اعتراف کیا گیا  ہے کہ پاکستان نے دہشتگردوں کی فنڈنگ کو روکنے  کے لیے اپنے نظام میں خاطر خواہ بہتری کی ہے۔

ترجمان چینی وزارت  خارجہ نے کہا کہ چین اور دیگر ممالک پاکستان کو امداد کی پیشکش جاری رکھیں گے۔