ڈی جی آئی ایس پی آر میجر جنرل بابر افتخارنے کہا ہے کہ 27فروری جارحیت کے خلاف مسلح افواج کےعزم کا دن ہے، اس دن سرپرائز دینے کاخواہشمند دشمن سرپرائز لے کر واپس لوٹ گیا۔

تفصیلات کے مطابق ڈی جی آئی ایس پی آر میجر جنرل بابر افتخار نےمیڈیا بریفنگ دیتے ہوئے کہا کہ پاکستان پر مشکل وقت آیا توعوام اور افواج نے بہادری دکھائی،آج یوم تشکر بھی ہے اور یوم عزم بھی۔

ڈی جی آئی ایس پی نے کہا کہ ہم ہرقیمت پر ملکی سلامتی کا تحفظ کریں گے، دشمن کی ہر سازش سے بخوبی آگاہ ہیں،پاکستان نے دن کی روشنی میں بھرپور جواب دیا، دو بھارتی طیارے مار گرائے۔

ان کا مزید کہناہے کہ مشرقی سرحد پر مسلسل بھارت سے خطرات درپیش ہیں،پاکستان کی 2019 میں سب سے زیادہ خلاف ورزیاں ریکارڈ کی گئیں،2019میں پاک بھارت جنگ دستک دے چکی تھی۔

میجر جنرل بابر افتخارنے کہا کہ پاک فوج نے بھارتی جارحیت کا بھرپور جواب دیا،آپریشن کے دوران 17 ہزار دہشت گردمارےگئے،آپریشن کے دوران 400ٹن سے زائد بارودی مواد قبضے میں لیاجبکہ ہزار سے زائد القائدہ کے دہشت گرد پکڑے اور مارے گئے۔

انہوں نے کہا کہ آپریشن ردالفساد طویل جنگ کی حالیہ کڑی ہے،آج پاکستان میں کھیل کے میدان آباد ہیں،46ہزار مربع کلو میٹرکاعلاقہ دہشت گردوں سے پاک کردیا،بھارت نے بوکھلاہٹ میں اپنا جہاز مار گرایا، ردالفساد کی آخری اسٹیج پرامن پاکستان ہے۔

میڈیا بریفنگ دیتے ہوئے میجر جنرل بابر افتخار نے کہا کہ جنگیں حب الوطنی اور عوام کی طاقت سے جیتی جاتی ہیں،افواج پاکستان نے عوام کی امید پر اتر کر دکھایا، تمام شہدا کے لواحقین کو خراج تحسین پیش کرتے ہیں۔

کشمیر میں بھارتی تسلط سے متعلق انہوں نے اظہار خیال کرتے ہوئے کہا کہ مسئلہ کشمیر انسانی تاریخ کا سب سے بڑا المیہ بنتاجارہا ہے، انسانی حقوق کونسل نے بھارت کی سازش کو بے نقاب کردیا۔

انہوں نے مزید کہاکہ دہشت گردی سے سیاحت تک کا سفر مشکل اور کٹھن تھا، پاکستان نے دہشت گردی کی جنگ عوام کی طاقت سے جیتی ہے۔

بھارتی گیدڈ بھپکیوں سے متعلق انہوں نے کہا کہ جنگ ہوئی تو نتائج خطرناک ہونگے، اندرونی سازش سے توجہ ہٹانے کیلئے بھارت کھیل کھیل رہا ہے۔

ڈی جی آئی ایس پی آر نے کرونا وائرس کے حملے سے متعلق کہا کہ کروناوائرس کے حوالے سے ہر قسم کے تعاون کیلئے تیار ہیں، ہم کرونا وائرس سے متعلق حالات کو مانیٹر کررہے ہیں۔