عدالتی حکم پر اسحاق ڈار کی رہائش گاہ میں قائم پناہ گاہ ختم کردی گئی۔

تفصیلات کے مطابق عدالتی حکم امتناعی کے بعد سابق وزیر خزانہ اسحاق ڈار کی رہائشگاہ میں قائم پناہ گاہ ختم کردی گئی،گھر میں موجود سامان نکال کر گھر کے سامنے واقع پارک میں منتقل کردیا گیا ہے اور اب پارک میں پناہ گاہ بنائی جائےگی۔

اسحاق ڈار کے گھر کی نیلامی روک دی گئی

ذرائع کے مطابق ہجویری ہاؤس کے باہر سے پناہ گاہ کابورڈ بھی ہٹادیاگیا ہے۔

انتظامیہ کا اس بارے میں کہنا ہے کہ اسحاق ڈار کے گھر کےسامنےموجودپارک میں پناہ گاہ بنائی جائےگی، پارک میں کنٹینر پہنچادیاگیا ہے ، جس میں 16بستر لگا دیےگئے ہیں، ایک کنٹینر خواتین کے لئے بھی رکھا جائےگا۔

انتظامیہ کا مزید کہنا ہے کہ پارک میں پناہ گاہ کی بجلی جلد بحال کر دی جائے گی جبکہ عارضی باتھ رومز بھی پہنچا دیےگئے ہیں۔

واضح رہے کہ سابق وزیر خزانہ اسحاق ڈار نے سماجی را بطے کی ویب سائٹ ٹوئٹر پر اپنی رہائش گاہ کو پناہ گاہ میں تبدیل کرنے کے فیصلے کی مذمت کرتے ہوئے اسے وزیراعظم اور پنجاب حکومت کا گٹھ جوڑ قرار دیا تھا جبکہ اس کے ساتھ ساتھ شہباز شریف نے حکومت کے اس اقدام کو سیاسی انتقام اور گری ہوئی حرکت قرار دیا تھا۔