وزیر اعظم عمران خان کی معاون خصوصی ڈاکٹر فردوس عاشق اعوان کاکہناہے کہ احتجاج کرنے والوں نے قوم کو غربت، قرض اور مہنگائی کے دلدل میں دھکیل دیا۔

 سماجی رابطے کی ویب سائٹ ٹوئٹر پربیان دیتے ہوئے ڈاکٹر فردوس عاشق اعوان نے لکھا کہ ‏پاکستان کے عوام کا خون چوس کرغریبوں کے پیسے پر پلنے والے آج حکومت میں کفیل ڈھونڈ رہے ہیں جبکہ مافیا کے سرغنہ لندن میں ہیں اور خواجہ آصف صاحب کو چاہیے کہ وہاں رابطہ کریں۔

ڈاکٹرفردوس عاشق اعوان نے کہا کہ ‏احتجاج کرنے والے عوام کے وہ مجرم ہیں جنہوں نے اس قوم کو غربت، قرض اور مہنگائی کی دلدل میں دھکیلا، یہ ان لوگوں کے نمائندے ہیں جنہوں نے پاکستان کے ہوائی اڈے تک عالمی اداروں میں گروی رکھے۔

معاون خصوصی نےحزب اختلاف پرکڑی تنقید کرتےہوئےکہا کہ ‏یہ ان لوگوں کااحتجاج تھا جوعوام کے خرچے پراب بھی مزے اڑا رہے ہیں، اقتدار میں رہ کرانہوں نے قوم سے اس کی زندگی اور مستقبل چھین لیا۔

معاون خصوصی نے کہا کہ ‏پارلیمنٹ ہاؤس کے باہرحزب اختلاف جماعتوں کا احتجاج ان کی سیاسی محرومیوں کے ماتم کے سوا کچھ نہیں ہے اور حزب اختلاف کی جماعتیں عوام کے لیے نہیں بلکہ اپنے سیاسی مفادات کے لیے احتجاج کر رہی ہیں۔ ان کے پیٹ میں عوام کی ہمدردی کا نہیں بلکہ اپنی بدعنوانی اور اقتدار کا درد ہو رہا ہے۔

بلاول بھٹو کو مخاطب کرتے ہوئے ڈاکٹر فردوس عاشق اعوان نے کہا کہ بلاول صاحب یہ آپ کے دور کی کرپشن ہے جس کا خمیازہ قوم بھگت رہی ہے، ابو اور پھوپھو سے کہیں کہ قوم کا لوٹا ہوا پیسہ واپس کر دیں، مہنگائی ختم ہو جائے گی۔