حریت رہنما یاسین ملک کی اہلیہ مشعال ملک نے کہا ہے کہ کشمیر میں جو ظلم ہورہا ہے اس کی مثال نہیں ملتی،کشمیر کی  حق خود ارادیت سے کم کوئی فیصلہ قبول نہیں کریں گے۔

یوم یکجہتی کشمیر کے سلسلے میں لاہور پریس کلب میں سیمینار سے خطاب کرتے ہوئے مشعال ملک کا کہنا تھا کہ مسئلہ کشمیر پر تمام سیاسی قیادت کی اے پی سی بلائی جائے۔

سیمینارمیں گورنر پنجاب چوہدری محمد سرور نے بھی خطاب کیا اور کہا کہ کشمیری عوام کو بھارتی ظلم و بربریت کا مقابلہ کرنے پر خراج تحسین پیش کرتا ہوں، مودی نے کشمیر کی حیثیت تبدیل کرکے بہت بڑی غلطی کی، بھارت میں انسانیت پر یقین رکھنے والے لوگ شہریت بل کے خلاف متحد ہوگئے ہیں۔

گورنر پنجاب چوہدری محمد سرور نے یہ بھی کہا کہ کشمیری بھائی آزادی کےلئے جانوں کے نذرانے پیش کر رہے ہیں، یورپی پارلیمنٹ نے پہلی بار مسئلہ کشمیر کو اقوام متحدہ کی قراردادوں کے مطابق حل کرنے کی قرارداد پیش کی۔