سراج الحق کا کہنا ہے کہ  ’میرا جسم، میری مرضی‘ کے نعرے لگانے والی خواتین کے لیے سینیٹ اور قومی اسمبلی میں آواز اٹھاؤں گا۔

تفصیلات کے مطابق اسلام آباد میں تکریمِ نسواں مارچ سے خطاب کرتے ہوئے جماعتِ اسلامی کے امیر سراج الحق نے کہا کہ ’میرا جسم میری مرضی‘ کے نعرے لگانے والی خواتین شاید کچھ محرومیوں کا شکار ہوں۔

سراج الحق نے کہا کہ پارلیمنٹ میں عائشہ سید کا پیش کردہ چارٹر آف ڈیمانڈ پیش کروں گا، اسلام نے خاندان کی صورت میں عورت کو تحفظ دیا ہے۔

انھوں نے مزید کہا کہ ہوسکتا ہے کہ ان خواتین سے معاشرے نے کوئی ناانصافی کی ہو، ان خواتین کے ساتھ جرگے کے بعد ان کے جائز مطالبات کے لیے میں قومی اسمبلی اور سینیٹ میں آواز اٹھاؤں گا۔

امیرِ جماعت اسلامی پاکستان نے یہ بھی کہا کہ میں نے اپنے بچوں کو سمجھایا ہے کہ اگر میرے اور اپنی ماں کے حکم میں سے کسی ایک کا حکم ماننا پڑے تو اپنی ماں کا حکم ماننا۔