شیخ رشید نے کہا ہے کہ لاک ڈاؤن کیلئے وزارت ریلوے کو اعتماد میں نہیں لیا گیا۔

تفصیلات کے مطابق وزیر ریلوے شیخ رشید نے کہا ہے کہ لاک ڈاؤن کیلئے وزارت ریلوے کو اعتماد میں نہیں لیا گیا، ریلوے سے متعلق پنجاب میں نہیں سندھ میں مسائل سامنے آ رہے ہیں، کسی بھی ٹرین کو راستےمیں نہیں روک سکتے۔

وفاقی وزیر نے کہا کہ ایک ٹرین 72 گھنٹے بعد واپس آتی ہے، رش والی ٹرینیں بند کر دیں مگر لوگ ہر ٹرین میں سوار ہیں، سندھ میں لوگ آنہیں رہے بلکہ جا رہے ہیں، 40 ٹرینوں پر بیشتر لوگ آج سندھ سے نکل جائیں گے۔

وزیر ریلوے کا مزید کہنا تھا 46 ٹرینیں بند کرنے کا فیصلہ کیا ہے، تمام ٹکٹس واپس کرنا پڑے تو نہیں کرسکیں گے، آج ٹرینوں سے متعلق فیصلہ ہو جائے گا۔

انہوں نے کہا وزیراعظم سے مشاورت کے بعد آج اعلان کروں گا، سفارشات لے کر جا رہا ہوں، حتمی فیصلہ وزیراعظم کریں گے، حکومت کی ذمہ داری ہے لوگوں کی مشکلات میں سہارا بن جائے۔

شیخ رشید نے کہا کہ لوگ سندھ سے پنجاب اور اپ کنٹری جا رہے ہیں، مزدوروں کو اگر گھروں تک نہیں پہنچایا تو بہت برا حال ہوگا، لاکھوں مزدور لاک ڈاؤن کی وجہ سے گھر جانا چاہتے ہیں، آج شام تک سندھ سے لوگوں کو گھروں کے لیے ٹرینوں پر روانہ کر دیا جائے گا۔